საქართველოს პრეზიდენტის პრეს-სპიკერმა მანანა მანჯგალაძემ მიუნხენის უსაფრთხოების 47-ე კონფერენციაში ქართული მხარის მონაწილეობა შეაჯამა.
როგორც მანჯგალაძემ განაცხადა, მიუნხენის კონფერენციამ კიდევ ერთხელ მისცა ქართულ მხარეს საშუალება, რომ საერთაშორისო საზოგადოებისთვის საქართველოში არსებული პრობლემები გაეცნო.
"პრეზიდენტმა სააკაშვილმა საერთაშორისო საზოგადოებას კიდევ ერთხელ გააცნო ოკუპირებულ რეგიონებში არსებული მდგომარეობა. ეს პირველ რიგში ეხება ოკუპირებულ ტერიტორიებს და იმ ქმედებებს, რომელსაც რუსეთის ფედერაცია ამ ტერიტორიებზე ახორციელებს. რუსეთი განაგრძობს ცეცლის შეწყვეტის შესახებ შეთანხმების არ შესრულებას. რუსეთმა ოკუპირებულ ტერიტორიაზე დამატებითი შეიარაღება შეიტანა, რაც კიდევ ერთხელ არღვევს 2008 წელს დადებულ შეთანხმებასა და ევროპის ჩვეულებრივი შეიარაღების შეთანხმებას", - განაცხადა მანჯგალაძემ.
მანჯგალაძის თქმით, საკმაოდ მნიშვნელოვანი შეხვედრა გაიმართა პრეზიდენტ სააკაშვილსა და გერმანიის კანცლერ ანგელა მერკელს შორის.
"საკმაოდ მნიშვნელოვანი კონფერენცია იყო ორმხრივი შეხვედრებისთვის. პრეზიდენტმა სააკაშვილმა შეხვედრა გამართა გერმანიის კანცლერ ანგელა მერკელთან. შეხვედრისას, მხარეებმა რუსეთ-საქართველოს ურთიერთობის საკითხები განიხილეს. ანგელა მერკელმა ქართულ მხარეს განუმარტა, რომ რუსეთთან დიალოგის დროს, მუდმივად აყენებს 12 აგვისტოს ცეცხლის შეწყვეტის შესახებ შეთანხმების შესრულების საკითხს", - განაცხადა მანჯგალაძემ პრეზიდენტის სასახლეში გამართულ ბრიფინგზე.
პრეს-სპიკერის განმარტებით, მიუნხენის უსაფრთხოების 47-ე კონფერენციის ფარგლებში მნიშვნელოვანი შეხვედრა გაიმართა ავსტრალიის საგარეო საქმეთა მინისტრ კევინ რადთან.
"საქართველოს პრეზიდენტი მიხეილ სააკაშვილი ავსტრალიის საგარეო საქმეთა მინისტრს კევინ რადს შეხვდა. ლიდერებმა ორმხრივი ურთიერთობისა და სამომავლო თანამშრომლობის საკითხები განიხილეს. შეხვედრისას გადაწყდა, რომ 2012 წელს ავსტრალიაში საქართველოს საელჩო გაიხსნება", - აღნიშნა მანჯგალაძემ.
პრეს-სპიკერმა ისაუბრა სააკაშვილისა და შვეიცარიის პრეზიდენტ მიშელინ კალმ-რეის შეხვედრაზეც.
"მიუნხენის კონფერენციის ფარგლებში, მიხეილ სააკაშვილი ასევე შვეიცარიის პრეზიდენტს მიშელინ კალმი-რეის შეხვდა. ორმხრივი თანამშრომლობის გარდა, მხარეებმა რუსეთ-საქართველოს ურთიერთობაში არსებული პრობლემური საკითხები განიხილეს. შეხვედრის ერთ-ერთი მთავარი თემა იყო შვეიცარიის როლის გააქტიურება, როგორც მედიატორი ქვეყნისა, საქართველოსა და რუსეთს შორის", - განაცხადა მანანა მანჯგალაძემ.
