საქართველოს პრეზიდენტი მიხეილ სააკაშვილი პარლამენტში წლიური მოხსენებით 11 თებერვალს, დღის მეორე ნახევარში, გამოვა.
ამის შესახებ დღეს, საგაზაფხულო სესიის პირველ პლენარულ სხდომაზე, პარლამენტის თავმჯდომარემ დავით ბაქრაძემ განაცხადა.
მისი თქმით, პრეზიდენტთან კონსულტაციების გავლის შემდეგ მისგან თხოვნა მიიღო, რომ გამოსვლა 10 თებერვლიდან 11 თებერვლისთვის გადაეწიათ.
"კვირის მეორე პლენარულ სხდომა ხუთშაბათის ნაცვლად პარასკევს, 11 თებერვალს გაიმართება, საქართველოს პრეზიდენტი მობრძანდება და სიტყვით მიმართავს პარლამენტს და საზოგადოებას. რაც შეეხება პრეზიდენტის გამოსვლის ფორმატს, ამ კუთხით გარკვეული ტრადიცია უკვე ჩამოყალიბდა და წელსაც იგივე სქემით გავყვებით, როგორიც იყო წინა წლების განმავლობაში", - აღნიშნა ბაქრაძემ და აქვე დასძინა, რომ ფორმატთან დაკავშირებით კონსულტაციების გაგრძელებაზე მზად არის.
მისივე თქმით, პრეზიდენტის გამოსვლის ფორმატთან დაკავშირებით, თუ საჭირო გახდება, ბიუროს დამატებითი სხდომა ჩატარდება.
პარლამენტის თავმჯდომარის თქმით, 11 თებერვალს დღის პირველ ნახევარში პლენარული სხდომა ჩატარდება და დღის წესრიგით გათვალისწინებული საკითხების განხილვა მოხდება, ხოლო დღის მეორე ნახევარი პრეზიდენტის გამოსვლას დაეთმობა.
ამასთან, პარლამენტის ვიცე-სპიკერმა მოითხოვა, პრეზიდენტის გამოსვლის დროს დებატების დეტალებზე დამატებითი კონსულტაციები გაიმართოს და განისაზღვროს, თუ რამდენი დრო მიეცემა გამომსვლელს.
