ბრიტანული გამოცემა "Conservativehome" საქართველოს პრეზიდენტზე მორიგ სტატიას აქვეყნებს. მიხეილ სააკაშვილთან წინა კვირას გამოქვეყნებული ინტერვიუსგან განსხვავებით, მასში სტატიის ავტორი კარლ თომსონი საქართველოს პირველი პირის მმართველობას აკრიტიკებს და აცხადებს, რომ "სააკაშვილის აპოლოგეტები საქართველოში დემოკრატიას იმაზე მეტ ზიანს აყენებს, ვიდრე რუსეთი ინატრება".
"2008 წლის რუსეთ-საქართველოს ომის შემდეგ, სააკაშვილის რეჟიმის, როგორც რეგიონში რუსეთის გავლენის საპირწონედ წარმოჩენა, მოდური გახდა. როდესაც ომი დაიწყო, ყველა პარტიის წარმომადგენელი ერთდროულად გმობდა "რუსულ აგრესიას" და ადიდებდა საქართველოს, როგორც რუსეთის საზღვრებთან აყვავებულ დემოკრატიას. მაშინ ისეთმა წინადადებამაც კი გაიჟღერა, რომ საქართველო ნატო-სა და ევროკავშირში წევრობის კანდიდატებისთვის არსებული მოთხოვნების გარეშე მიეღოთ და რუსეთთან საბრძოლველად კავკასიაში ბრიტანული არმია გაეგზავნათ. ამ წინადადების მასშტაბს და მნიშვნელობას, ასევე მის შედეგს ბრიტანული არმიისთვის იმ დროს, როდესაც ისედაც ორ ომში ვართ ჩაბმული ერაყსა და ავღანეთში, როგორც სჩანს, არავინ ითვალისწინებდა. შემდეგ კი ევროკავშირმა და ეუთო-მ გამოძიება ჩაატარეს, რომლის შედეგად კონფლიქტის დაწყებასა და მშვიდობიანი მოსახლეობისთვის ცეცხლის გახსნაში საქართველო დაადანაშაულეს", - - წერს კარლ თომსონი, რომლის სტატიის ქართულ თარგმანსაც "Foreignpress"-ი აქვეყნებს.
ამასთან, ჟურნალისტი მიხეილ სააკაშვილის ხელისუფლების მიღწევებზეც საუბრობს, თუმცა აქვე იმასაც განმარტავს, რომ ეკონომიკურ სექტორში წინსვლის პარალელურად, საქართველოს პრეზიდენტად მის გახდომას უამრავი უარყოფითი ცვლილება მოჰყვა.
"სინამდვილეში სააკაშვილს მართლაც შეუძლია მთელი რიგი წარმატებული რეფორმებით დაიკვეხნოს. მან აგონიაში მყოფი ქართული ეკონომიკის რეფორმირება შესძლო და საქართველო, რომელიც გაკოტრების ზღვარზე იყო, ბიზნესის იოლად წარმოების მხრივ მსოლფლიოში ერთ-ერთ პირველ ქვეყნად აქცია. ასეთ წარმატებას მან დიდწილად თავისუფალი ბაზრის პრინციპებისა და გადასახადების შემცირების გზით მიაღწია, თუმცა ხელისუფლებაში სააკაშვილის მოსვლას სხვა ცვლილებებიც მოჰყვა. საქართველოში სულ უფრო ხშირად და უხეშად არღვევდნენ ადამიანის უფლებებს, ახშობდნენ თავისუფალ სიტყვას, კანონის ნორმები ეწირებოდა სახელმწიფო ხელისუფლების სულ უფრო მზარდ თვითნებობას", - აღნიშნულია სტატიაში.
ამ კონტექსტში სტატიის ავტორი მიხეილ სააკაშვილს ავტორიტარიზმში ადანაშაულებს და აღნიშნულის დასადასტურებლად რამდენიმე მაგალითი მოჰყავს. მათ შორის, მასალაში ჯერ ზურაბ ჟვანიას, შემდეგ კი ბიზნესმენ ბადრი პატარკაციშვილის (რომელიც ამავე დროს პრეზიდენტობის ერთ-ერთი კანდიდატი იყო) საეჭვო ვითარებაში გარდაცვალება, ასევე 7 ნოემბრის აქციის დარბევა, ირაკლი ოქრუაშვილის დაპატიმრება, იმიტირებული "ქრონიკა" და სხვა ფაქტები მოხვდნენ.
"საქართველოს სვლა ავტორიტარიზმისკენ სწორედ იმ მომენტიდან შეინიშნება, როდესაც სააკაშვილი ხელისუფლებაში მოვიდა. რეჟიმის ოპონენტები მას კორუფციაში, ასევე რამდენიმე ცნობილი პოლიტიკური მოღვაწის გაურკვეველ ვითარებაში დაღუპვის გამო (რომელთა შორის ერთ-ერთი პრეზიდენტობის კანდიდატი იყო) ადანაშაულებენ. ქვეყანაში პოლიტიკური სიტუაცია 2007 წლის ნოემბრის მოვლენებმა გაამწვავა, როდესაც 50 000-ზე მეტი დემონსტრანტი სააკაშვილის მმართველობის წინააღმდეგ თბილისის ქუჩებში გამოვიდა. ამ გამოწვევას სააკაშვილის ხელისუფლებამ იმით უპასუხა, რომ დემონსტრანტებს პოლიცია ხელკეტებითა და ცრემლსადენი გაზით შეუსია. ერთადერთი სატელევიზიო სადგური, რომელიც საპროტესტო აქციის მიმდინარეობას აშუქებდა, ეთერიდან იარაღით მუქარის ქვეშ გათიშეს, შემდეგ კი საკუთრება სახელმწიფოს გადასცეს, ხოლო როდესაც სააკაშვილის მთავრობის თავდაცვის ყოფილმა მინისტრმა განაცხადა, რომ მომდევნო საპრეზიდენტო არჩევნებში მიიღებდა მონაწილეობას, ის ორ დღეში დააპატიმრეს და აწამეს", - ნათქვამია სტატიაში.