დღეს, 8 თებერვალს, 12:00 საათზე, პარლამენტის საგაზაფხულო სესიის პირველი პლენარული სხდომა ჩატარდება.
როგორც პარლამენტის თავმჯდომარემ დავით ბაქრაძემ განაცხადა, დეპუტატების 35 საკითხს განიხილავენ. კერძო სკოლებში და პროფესიულ სასწავლებლებში მანდატურების შეყვანასთან დაკავშირებულ კანონპროექტსა და ერთიანი სატრანსპორტო ადმინისტრაციის სამ სააგენტოდ დაყოფის საკითხს პირველი მოსმენით დაამტკიცებენ.
ბაქრაძის შეფასებით, მიუხედავად იმისა, რომ საგაზაფხულო სესიის გახსნა მნიშვნელოვანია, კვირის მთავარ მოვლენად საქართველოს პრეზიდენტის გამოსვლა რჩება.
"იმედი მაქვს, ეს იქნება ძალიან კარგი, მწვავე, მაგრამ კონსტრუქციული დებატები, როგორც წინა წელს", - აღნიშნა ბაქრაძემ.
საგაზაფხულო სესიის პირველი პლენარული სხდომა საქართველოს ჰიმნით გაიხსნება.
