"ლეიბორისტებმა" საქართველოს პარლამენტს საგაზაფხულო სესიის დაწყებასთან დაკავშირებით მორიგი "საბოიკოტო" წერილით მიმართეს.
აღნიშნული წერილი დღეს ბიუროს სხდომაზე იქნა წარდგენილი, რომელშიც გარდა პოლიტიკური ბოიკოტის მიზეზებისა, განმარტებულია "ლეიბორისტი" დეპუტატების მიერ ხელფასის აღებისა და მასზე უარის არ თქმის მიზანი.
"მთელი მსოფლიოსთვის ცნობილია, რომ თქვენმა პარტიის ლიდერმა პრეზიდენტმა სააკაშვილმა ძალადობითა და მოსყიდვით არჩევნების მასობრივი გაყალბებით მოახერხა საპარლამენტო ხელისუფლების უზურპაცია, რის გამოც ჩვენ, ხალხის მიერ არჩეულმა დეპუტატებმა, უარი ვთქვით დავმჯდარიყავით თქვენი უკანონო დეპუტატების გვერდით და ვაგრძელებთ პოლიტიკურ ბოიკოტს პარლამენტის რეგლამენტის 135-ე მუხლის მე-8 პუნქტის შესაბამისად.
რაც შეეხება თქვენს მონა ტელევიზიებს, რომლებიც ყოველი საპარლამენტო სესიის წინ აპარებენ ჩვენ მიერ კანონიერი ხელფასის აღების ფაქტს, მათ შევახსენებთ, რომ არ ვაპირებთ ჩვენი თანხის ჩუქებას უსაქმური დეპუტატებისთვის პრემიის სახით", - ნათქვამია "ლეიბორისტების" მიმართვაში.
მიმართვაში საუბარია, რომ 1999 წლიდან "ლეიბორისტების" პარლამენტში არშეშვებით პარტიისთვის მიყენებულმა სუფთა მატერიალურმა ზარალმა 2 500 000 ევრო შეადგინა და აღნიშნული გაანგარიშება ევროსასამართლოში უკვე წარდგენილია.
"ამ თანხას აუცილებლად ამოვიღებთ სააკაშვილის კრიმინალთან ჯიბეებიდან. ასევე განვლილი პერიოდში თქვენმა პარლამენტმა უშრომლად შეიტყაპუნა ხელფასის სახით 33 500 000 ლარი, მივლინებებზე 3 400 000 ლარი და სატელეფონო ხარჯებზე 1 500 000 ლარი", - ნათქვამია მიმართვაში.
მიმართვას ხელს აწერენ "ლეიბორისტული პარტიიდან" დეპუტატები შალვა ნათელაშვილი, გიორგი გუგავა, კახაბერ ძაგანია და იოსებ შატბერაშვილი.