„მახსენდება ოტია იოსელიანის ფრაზა: „მოღალატე რომ ერთგულებაზე ლაპარაკობს, იგი მაშინ თავის ღალატსაც ღალატობსო“. ეს გახარიას შეეფერება, რომელიც უცხოეთიდან გვმოძღვრავს , თითქოს, რაღაც სამშობლოს ერთგულებაზე საუბრობს. ყველაზე კარგად ჩვენ გუნდს მოგვეხსენება, რატომ შეეფერება ეს ყველაზე კარგად გახარიას. საზოგადოებას ძალიან ბევრჯერ აქვს მოსმენილი გახარიას მხრიდან სამი თუ ოთხი სხვადასხვა ვერსია, რატომ გადადგა, რეზინის ტყვიების გამოყენებაზე მისი შეცვლილი ჩვენება, ჩორჩანაზე მისი ურთიერთგამომრიცხავი განცხადებები და ასე შემდეგ“, - განაცხადა პარლამენტის პლენარულ სხდომაზე ფრაქციის, „ქართული ოცნება“ თავმჯდომარის პირველმა მოადგილემ ლევან მაჭავარიანმა.
მისი თქმით, პარტია „გახარია საქართველოსთვის“ „კოლექტიურ ნაციონალურ მოძრაობას“ წარმოადგენს.
„2022 წელს, საქართველოსთვის ურთულეს პერიოდში, ჩვენ დანის პირზე ვიარეთ, რომ ომში არ აღმოჩენილიყავით და თქვენ, „კოლექტიურ ნაციონალურ მოძრაობასა“ და მდიდარ არასამთავრობო ორგანიზაციებთან ერთად, საქართველოს გაშავების კამპანიას აწარმოებდით - თითქოს საქართველო იყო „შავი ხვრელი“ რუსეთისთვის სანქციების თავის არიდების კუთხით. ჩვენი ძალისხმევით, ევროკავშირიდან, ბრიტანეთიდან, ამერიკის შეერთებული შტატებიდან ჩამოვიდნენ სანქციების კოორდინატორები და დაადასტურეს, რომ საქართველო საუკეთესოდ მუშაობდა ამ მიმართულებითაც. თქვენ ერთი ბოდიშიც არ მოგიხდიათ“, - განაცხადა ლევან მაჭავარიანმა.
ფრაქციის პირველმა მოადგილემ 2024 წლის საპარლამენტო არჩევნების პერიოდიც შეახსენა „გახარია საქართველოსთვის“ წარმომადგენლებს.
„საქართველო გადარჩა იმიტომ, რომ ჩვენი ხალხი ბრძენია და „ქართულმა ოცნებამ“ 54% აიღო, თორემ ვინ წაიღებდა ძალოვანი მინისტრების თანამდებობებს, ვინ გახდებოდა პრემიერ-მინისტრი და ასე შემდეგ, თქვენ ამაზე საზოგადოებას არ ესაუბრებოდით“, - განაცხადა ლევან მაჭავარიანმა.
იგი ასევე შეეხო იმ წერილს, რომელსაც, მისი შეფასებით, „კოლექტიური ნაციონალური მოძრაობა“ აწერდა ხელს.
„2024 წლის არჩევნებიდან ერთ თვეში, თქვენ, „კოლექტიურმა ნაციონალურმა მოძრაობამ“ მიმართეთ ევროკავშირს, რომ საქართველო დაესაჯათ, ყველანაირი ურთიერთობა გაეწყვიტათ საქართველოსთან ყველა დონეზე. ეს ქვეყნის ღალატია. ჩვენ მხოლოდ ფაქტებზე ვსაუბრობთ, თქვენგან და თქვენი გარე უფროსებისგან განსხვავებით, რომლებიც აღქმების თეორიაში ხართ და ცდილობთ, აღქმებზე დაფუძნებით შეიყვანოთ ჩვენი საზოგადოება შეცდომაში“, - განაცხადა ლევან მაჭავარიანმა.
მან „გახარია საქართველოსა“ და „ლელო-ძლიერ საქართველოს“ შორის 4 ოქტომბრის არჩევნებთან დაკავშირებით გაფორმებულ მემორანდუმზეც ისაუბრა და „გახარია საქართველოსთვის“ დეპუტატებს კითხვით მიმართა: შერცხვათ თუ არა მათი პარტიის ლიდერებს, როდესაც ისინი „ლელოსთან“ გაერთიანდნენ.
„არჩევნების წინ „ლელოსთან“ გაერთიანდით. ყველას კარგად გვახსოვს, თქვენი და „ლელოს“ ლიდერები რა სიტყვებით მოიხსენიებდნენ ერთმანეთს - არ შერცხვათ, როდესაც გაერთიანდნენ? ბოდიში მოუხადეს ერთმანეთს? თუ რომელიმე გამოვიდა და ახსნა, რომელი ცდებოდა ბრალდებაში, რომელსაც უყენებდნენ?! იმიტომ მოუწიათ ხაზარაძეს და გახარიას დამეგობრება, რომ იმ ვერტიკალმა დაავალა, რომელსაც ჩვენ არაფორმალურ ოლიგარქიულ მმართველობას ვუწოდებთ, თუ გინდათ გლობალური ომის პარტია დავუძახოთ, გინდათ „დიფ სთეითი“, როგორც ტრამპი ეძახის. ერთი ვერტიკალით იმართებით. თქვენმა გარე უფროსებმა დივერსიფიცირება მოახდინეს, ვერ ჩამორეცხეს „ნაციონალურ მოძრაობას“ სისხლიანი წარსული და ფსონი თქვენსა და „ლელოზე“ დადეს. ამით შეეცადნენ ამომრჩეველი შეცდომაში შეეყვანათ, მაგრამ ჩვენი ხალხი ძალიან ბრძენია და სწორი დასკვნები გამოიტანა. თქვენი რეიტინგი, ხმებში რომ გადავთვალოთ, სამჯერ და უფრო მეტად არის შემცირებული წინა არჩევნებთან შედარებით. თქვენ თბილისში ერთი ადგილიც ვერ მოიპოვეთ საკრებულოში. აი, ასეთი პასუხი გაგცათ ქართველმა ხალხმა. როგორი მანევრითაც არ უნდა გააგრძელოთ მოღვაწეობა, ამას ვერ ჩამოირეცხავთ“, - განაცხადა ლევან მაჭავარიანმა.
