საქართველოს პრეზიდენტი მიხეილ სააკაშვილი პარლამენტში წლიური მოხსენებით 10 თებერვალს, დღის მეორე ნახევარში, გამოვა.
ამის შესახებ დღეს, ბიუროს სხდომაზე პარლამენტის თავმჯდომარემ დავით ბაქრაძემ განაცხადა.
"კვირის მეორე პლენარულ სხდომაზე, ხუთშაბათს, 10 თებერვალს, საქართველოს პრეზიდენტი მობრძანდება და სიტყვით მიმართავს პარლამენტს და საზოგადოებას. რაც შეეხება პრეზიდენტის გამოსვლის ფორმატს, ამ კუთხით გარკვეული ტრადიცია უკვე ჩამოყალიბდა და წელსაც იგივე სქემით გავყვებით, როგორიც იყო წინა წლების განმავლობაში", - აღნიშნა ბაქრაძემ.
მისივე თქმით, პრეზიდენტის გამოსვლის ფორმატთან დაკავშირებით ,თუ საჭირო გახდება, ბიუროს დამატებითი სხდომა ჩატარდება.
პარლამენტის თავმჯდომარის თქმით, არ არის გამორიცხული, რომ ხუთშაბათ, დღის პირველ ნახევარში პლენარული სხდომა ჩატარდეს და დღის წესრიგით გათვალისწინებული საკითხების მიღება მეორე მოსმენით მოხდეს. დღის მეორე ნახევარი კი პრეზიდენტის გამოსვლას დაეთმოს.