საქართველო თავის ქვეყნისთვის უსაფრთხოების გარანტიებს მოითხოვს და ასევე, მსოფლიო უსაფრთხოების მიმართ გულგრილი არ არის. ამის შესახებ "ჯი-ეიჩ-ენს" საპარლამენტო უმრავლესობის წევრმა ნუგზარ წიკლაურმა საქართველოს პრეზიდენტის მიხეილ სააკაშვილის მიუნხენის უსაფრთხოების კონფერენციაზე გამოსვლის შეფასებისას განუცხადა.
"პრეზიდენტმა აქცენტები გააკეთა იმ საკითხებზე, რომელიც საქართველოსთვის პრიორიტეტულია. ეს არის უსაფრთხოების და ოკუპირებულ ტერიტორიებზე არსებული პრობლემები. Aასევე, მნიშვნელოვანია, სახელმწიფო ლიდერებისადმი მოწოდება, რომ მტკიცე ნაბიჯები გადადგან, რათა რუსეთს არ შეექმნას გრძნობა, რომ მისი ქმედებები დაუსჯელი დარჩება", - აღნიშნა წიკლაურმა.
დეპუტატის თქმით, არსებითად მნიშვნელოვანი იყო საქართველოს პრეზიდენტის მხრიდან მსოფლიო უსაფრთხოების კონტექსტში საქართველოს როლზე საუბარი და ის, რომ ქართული მხარე მზადაა, საერთაშორისო უსაფრთხოების უზრუნველყოფისთვის ავღანეთში საკუთარი ძალები კიდევ გაზარდოს.
"ყველაზე მნიშვნელოვანი გზავნილი იყო პრეზიდენტის მხრიდან, რომ საქართველო უსაფრთხოების გარანტიებს ითხოვს საკუთარი ქვეყნისთვის და ასევე მსოფლიო უსაფრთხოების მიმართ გულგრილი არ არის. რაც შეეხება რუსეთზე ზეწოლას, ბოლო ორი წლის განმავლობაში ამ კუთხით საერთაშორისო ძალისხმევა ძალიან არის გააქტიურებული", - აღნიშნა "ჯი-ეიჩ-ენთან" საუბრისას წიკლაურმა.