დიდი ბრიტანეთის თავდაცვის მინისტრმა ჯონ ჰილიმ განაცხადა, რომ ლონდონი მზადაა უკრაინაში სამხედრო კონტინგენტი გაგზავნოს, რუსეთთან შეთანხმების მიღწევის შემდეგ. ამის შესახებ Sky News იუწყება.
„თუ აშშ-ის პრეზიდენტი დონალდ ტრამპი შეძლებს სამშვიდობო შეთანხმების მიღწევას, ჩვენ მზად ვიქნებით, უზრუნველვყოთ მშვიდობა გრძელვადიან პერსპექტივაში, რაც მოითხოვს ჩვენგან ინვესტიციების ჩადებას და ძალების განლაგებისთვის მომზადებას. კირ სტარმერმა განაცხადა, რომ მზადაა ბრიტანელი ჯარისკაცები გაგზავნოს უკრაინაში“, - განაცხადა ჰილიმ.
მან დასძინა, რომ დიდმა ბრიტანეთმა უკვე ემზადება „მილიონობით“ ფუნტის გამოყოფისთვის უკრაინაში ჯარების შესაძლო განლაგების მოსამზადებლად, თუ მშვიდობა იქნება მიღწეული.
ჟურნალისტის შეკითხვაზე, თუ რა თანხაზეა საუბარი, ჰილიმ უპასუხა, რომ ეს თანხა „გაცილებით მეტი იქნება, 100 მილიონ ფუნტზე მეტი“.
ჰილის თქმით, ვლადიმერ პუტინი ბრიტანეთს თავის „ნომერ პირველ მტრად“ მიიჩნევს ქვეყნის მიერ უკრაინის მხარდაჭერის გამო.
„ეს, უდავოდ, საფრთხის ახალი ერაა. მსოფლიო უფრო არასტაბილური, უფრო გაურკვეველი, უფრო საშიშია. მეორე მსოფლიო ომის დასრულების შემდეგ ევროპის უსაფრთხოება ასეთი რისკის ქვეშ არ ყოფილა, ამიტომ საჭიროა თავდაცვის ახალი ერა. ახლა ეს არის მკაცრი ძალის, ძლიერი ალიანსებისა და დამაჯერებელი დიპლომატიის ეპოქა“, – განაცხადა ჰილიმ.
მანამდე გავრცელდა ინფორმაცია, რომ სტარმერმა ტრამპს უკრაინისთვის სამშვიდობო შეთანხმების პროექტის შექმნა შესთავაზა, რომელიც ღაზის სექტორისთვის ტრამპის 20-პუნქტიანი გეგმის მსგავსი იქნება.
