საქართველოს მიერ კონტროლირებადი ტერიტორიის 80%-ში, ბოლო შვიდი წლის განმავლობაში, წარმატებული, მრავალეთნიკური საზოგადოება შეიქმნა.
ამის შესახებ საქართველოს პრეზიდენტმა მიხეილ სააკაშვილმა მიუნხენის კონფერენციაზე სიტყვით გამოსვლისას განაცხადა.
"საქართველოს ტერიტორიების მნიშვნელოვანი ნაწილი კვლავ ოკუპირებულია და ჩვენ ნახევარი მილიონი დევნილი, იძულებით გადაადგილებული პირი და ეთნიკური წმენდის მსხვერპლი გვყავს. ჩემი მთავრობა იმისთვის, რომ დაძაბულობა შენელდეს და კონფლიქტის მოგვარებას გზა გაეხსნას, მზადაა კონკრეტული ნაბიჯები გადადგას. ტერიტორიის იმ 80%-ზე, რომელსაც საქართველო აკონტროლებს, ბოლო შვიდი წლის განმავლობაში, მრავალეთნიკური, წარმატებული საზოგადოების შექმნა შევძელით, სადაც მთავრობისა და ეკონომიკური საქმიანობისადმი ხელი ყველას მიუწვდება", - აღნიშნა სააკაშვილმა.
მისივე თქმით, უკანონოდ ოკუპირებული ტერიტორიების მიმართ საქართველოს ხელისუფლებამ სახელმწიფო სტრატეგია შეიმუშავა, რომელიც ამ ტერიტორიებზე მცხოვრებ ხალხებს საშუალებას მისცემს იმ კავშირებით ისარგებლონ, რომელსაც საბჭოთა ლიდერები და მათი მემკვიდრეები სისტემატურად არღვევენ.