ჩვენი ევროპელი მეგობრები აქტიურად უნდა ჩაერთონ იმაში, რომ სწორედ მეორე მხარე დაეთანხმოს დიალოგის აუცილებლობასა და საჭიროებას - განაცხადა საქართველოს საგარეო საქმეთა მინისტრის მოადგილე ნინო კალანდაძემ მიუნხენის კონფერენციაზე მიხეილ სააკაშვილის გამოსვლის შეფასებისას.
მისი თქმით, საქართველო ყოველთვის შეეცდება დააფიქსიროს, რომ სამშვიდობო ინიციატივა ძალაშია.
"უპირველეს ყოვლისა, უნდა აღინიშნოს, რომ ეს არის ინიციატივა, რომელიც ჩვენ გავაჟღერეთ, გავაჟღერეთ არა მხოლოდ ვერბალურად, არამედ ვთქვით, რომ იმთავითვე ამ გადაწყვეტილებას ექნებოდა იურიდული ძალა. ნებისმიერ ტრიბუნაზე მზად ვართ, სადაც კი ამის საჭიროება იქნება, კიდევ ერთხელ დავაფიქსიროთ ჩვენი მზაობა, რომ ჩვენი სამშვიდობო ინიციატივა ძალაშია. შემდგომი ნაბიჯები უკვე უნდა გადადგას შემხვედრმა მხარემ, რომელიც მოლაპარაკების მაგიდას მეორე მხრიდან უნდა მოუსხდეს. ვინაიდან ერთმანეთში ამ მოლაპარაკებების შესაძლებლობას მოკლებული ვართ, მთავარი მონაწილეები, ასე ვთქვათ, ზეწოლისა თუ დამატებითი მოლაპარაკების წარმართვის თვალსაზრისით, არიან სწორედ ჩვენი ევროპელი მეგობრები. ეს განაცხადი სწორედ ამ მიზანს ემსახურება რომ კიდევ ერთხელ შესაძლებლობა მოგვცემოდა მოგვეწოდებინა ჩვენი დასავლელი პარტნიორებისთვის, რომ აქტიურად ჩაერთონ ამ დიალოგის წარმატებულად შედგომისათვის. კიდევ ერთხელ გაჟღერდეს, რომ ჩვენი მზაობა ძალაშია. მაგრამ ახლა უკვე ჩვენი ევროპელი მეგობრები აქტიურად უნდა ჩაერთნონ იმაში, რომ სწორედ მეორე მხარედ დაეთანხმოს ამ დიალოგის აუცილებლობასა და საჭიროებაში", - განაცხადა კალანდაძემ.
