საქართველო ავღანეთში დამატებითი სამხედრო ძალების გაგზავნას გეგმავს.
ამის შესახებ საქართველოს პრეზიდენტმა მიხეილ სააკაშვილმა მიუნხენის უსაფრთხოების კონფერენციაზე სიტყვით გამოსვლისას განაცხადა.
"ბოლო ორ წელიწადში მსოფლიომ გაიაზრა, რომ ისტორია 1991 წელს არ დასრულებულა და იგი ისევ ტრაგიკულად მიმდინარეობს. ცივმა ომმა ე.წ. დაბალი ინტენსიობის კანფლიქტები დატოვა, რაც საერთაშორისო თანამეგობრობის შეშფოთების მიზეზია. ამ დარბაზში ყველასთვის ნათელია, რომ ეს კონფლიქტები მსოფლიოზე გავლენას ახდენს. სახელმწიფოები საკუთარ უსაფრთხოებას ვერ უზრუნველყოფენ, თუ მათ საზღვრებს გარეთ არასტაბილურობის კერები იქნება", - აღნიშნა პრეზიდენტმა სააკაშვილმა.
მისივე თქმით, მას შემდეგ, რაც საქართველომ რთული პერიოდი გაიარა, ქართველებმა გააცნობიერეს, რომ უსაფრთხოების კუთხით ყველას, პატარასა და დიდი სახელმწიფოებსაც, საერთო პასუხისმგებლობა აკისრია.
"სწორედ ამიტომ ჩვენ ათასამდე ჯარისკაცი ავღანეთში მეგობრობის მხარდასჭერად გავგზავნეთ. ჩვენ ასევე შევთავაზეთ დამატებითი ძალების გაგზავნა და მომდევნო რამდენიმე თვეში ეს პროცესი დაიწყება, რაც კიდევ გაზრდის დახმარების მასშტაბებს. ეს ყველაფერი იმიტომ კეთდება, რომ ავღანელმა ხალხმა მშვიდობას მიაღწიოს და ქვეყანა ტერორისტების თავშესაფარად აღარ იქცეს", - აღნიშნა სიტყვით გამოსვლისას საქართველოს პრეზიდენტმა.
სააკაშვილის შეფასებით, მიუხედავად იმისა, რომ საქართველოში მხოლოდ 4 მილიონ 700 ათასი ადამიანი ცხოვრობს და მისი ტერიტორიების ნაწილი ისევ ოკუპირებულია, ქართული მხარისთვის პრიორიტეტი არა მხოლოდ უსაფრთხოების მოხმარება, არამდე მისი მიწოდებაც არის.
