უკრაინამ რუსეთის დარტყმებზე საპასუხოდ მხოლოდ თავისი იარაღი გამოიყენა. აშშ-ის პრეზიდენტ დონალდ ტრამპთან საუბრის შემდეგ, შესაძლოა, უკრაინამ მეტი დახმარება მიიღოს, - ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
„შესაძლებლობების თვალსაზრისით, ჩვენ საკმარისი შესაძლებლობები გვაქვს. ახლა კითხვა ფინანსებს ეხება. მანამდე ჩვენს იარაღს მხოლოდ შორ მანძილზე სამიზნეების წინააღმდეგ ვიყენებდით.
აშშ-ის პრეზიდენტთან შეხვედრის შემდეგ, შესაძლოა, კიდევ მეტი გვქონდეს, არ ვიცი, ვნახოთ“, - განაცხადა ზელენსკიმ ხუთშაბათს, კოპენჰაგენში, დანიის პრემიერ-მინისტრ მეტე ფრედერიქსენთან ერთად გამართულ პრესკონფერენციაზე.
მან აღნიშნა, რომ უკრაინას არასდროს შეუტევია რუსეთში სამოქალაქო ინფრასტრუქტურაზე, თუმცა ყოველთვის პასუხობდა უკრაინის ინფრასტრუქტურაზე მათ თავდასხმებს.
„დაახლოებით ერთი წლის წინ ჩვენ არ გვქონდა რეაგირების შესაძლებლობა და შემდეგ გახსოვთ, რა გააკეთეს: მათ უკრაინაში ელექტროენერგიის გათიშვა და ბევრი საშინელი რამ გამოიწვიეს.
ახლა ჩვენ შეგვიძლია ვუპასუხოთ და ისინიც იგრძნობენ ჩვენს ძლიერ პასუხებს. ცოტა მეტი დაფინანსება გვჭირდება“, - აღნიშნა პრეზიდენტმა.
მისი თქმით, რუსები ამჟამად დღეში დაახლოებით 500-600 უპილოტო საფრენ აპარატს იყენებენ, უკრაინა კი - 100-150-ს.
ზელენსკიმ ადრე განაცხადა, რომ მან აშშ-ის პრეზიდენტ დონალდ ტრამპთან შორი მოქმედების იარაღის სისტემის მიწოდების საკითხი განიხილა, თუმცა ახლა ყველაფერი ამერიკის ლიდერის გადაწყვეტილებაზეა დამოკიდებული.
