საქართველოს პრეზიდენტი მიხეილ სააკაშვილი გერმანიის კანცლერს ანგელა მერკელს შეხვდა.
მხარეებს შორის პირისპირ შეხვედრა, რომელიც მიუნხენის საერთაშორისო კონფერენციის ფარგლებში გაიმართა, რამდენიმე წუთის წინ დასრულდა.
ქართული დელეგაციის წევრის, საგარეო საქმეთა მინისტრის მოადგილის ნინო კალანდაძის განცხადებით, შეხვედრაზე ანგელა მერკელს საქართველოს ოკუპირებულ ტერიტორიებზე არსებულ ვითარებასთან დაკავშირებით დეტალური ინფორმაცია მიეწოდა.
"ჩვენ მას გადავეცით ყველა ის მასალა, რომელიც ოკუპირებულ ტერიტორიებთან დაკავშირებით გაგვაჩნია, მათ შორის ცხინვალსა და აფხაზეთში რუსეთის შეიარაღების რაოდენობის შესახებ", - განმარტა კალანდაძემ.
ამასთან, როგორც მან ჟურნალისტებს განუცხადა, თბილისმა გერმანიას აღებული ვალდებულებების შესრულებასთან დაკავშირებით მოსკოვზე პოლიტიკური ზეწოლაც სთხოვა.
"ჩვენ გერმანულ მხარეს კიდევ ერთხელ ვთხოვეთ დახმარება, რომ მოუწოდოს რუსეთის ფედერაციას იმ ვალდებულებების შესრულებისკენ, რომელიც მას აქვს აღებული", - დასძინა საგარეო უწყების ხელმძღვანელის მოადგილემ.
შეგახსენებთ, რომ მიუნხენში აღნიშნული კონფერენცია გუშინ გაიხსნა. მის ფარგლებში პრეზიდენტი სააკაშვილი დღის განმავლობაში კიდევ რამდენიმე ორმხრივ შეხვედრას გამართავს, ხვალ კი კონფერენციის მონაწილე 350-ზე მეტ დელეგას სიტყვით მიმართავს.
