საქართველოს პრეზიდენტი მიხეილ სააკაშვილი მიუნხენის უსაფრთხოების კონფერენციის გახსნამდე ტრადიციულ სადილს დაესწრო.
მაგიდასთან სხვადასხვა რანგის პოლიტიკოსები, ასევე ეკონომიკისა და ფინანსური გუნდის წევრები იყვნენ შეკრებილნი. სადილს ესწრებოდა გაეროს გენერალური მდივანი პან გი მუნიც.
სადილის შემდეგ მიხეილ სააკაშვილი გერმანიის თავდაცვის მინისტრს შეხვდა.
მიუნხენის უსაფრთხოების 47-ე ყოველწლიური კონფერენცია გუშინ გაიხსნა. მას 350-ზე მეტი მაღალი დონის სტუმარი ესწრება. ხვალ, 6 თებერვალს, კონფერენციაზე საქართველოს პრეზიდენტი სიტყვით გამოვა.
კონფერენციაზე განსახილველი საკითხებია: ახალი გამოწვევები, საერთაშორისო უსაფრთხოების პოლიტიკა, მსოფლიო ფინანსური კრიზისი, კიბერ ომი, განიარაღება და ბირთვული იარაღის გაუვრცელებლობა.
აღსანიშნავია, რომ დღეს, 5 თებერვალს, საქართველოს პრეზიდენტი გერმანიის კანცლერს ანგელა მერკელს, შვეიცარიის პრეზიდენტს მიშელინ კალმი-რეისს და ავსტრალიის პრემიერ-მინისტრს შეხვდება.
ორმხრივი შეხვედრები მიუნხენში მიმდინარე უსაფრთხოების ყოველწლიური კონფერენციის ფარგლებში გაიმართება.