დღეს, 5 თებერვალს, მიუნხენში მიმდინარე უსაფრთხოების კონფერენციის ფარგლებში პირისპირ შეხვედრას რუსეთის საგარეო საქმეთა მინისტრი სერგეი ლავროვი და აშშ-ის სახელმწიფო მდივანი ჰილარი კლინტონიც გამართავენ.
ოფიციალური ინფორმაციით, ლავროვისა და კლინტონის მოლაპარაკებების მთავარი თემა ბირთვული შეიარაღების შემცირების შესახებ ორ ქვეყანას შორის მიღწეული შეთანხმება იქნება. მხარეები საკანონმდებლო ორგანოების მიერ რატიფიცირებულ დოკუმენტებსაც გაცვლიან.
არაოფიციალური ინფორმაციით, არ არის გამორიცხული შეხვედრაზე გაყინული კონფლიქტების საკითხიც დაისვას და ამ კონტექსტში საუბარი საქართველოს ოკუპირებულ ტერიტორიებსაც შეეხოს.
სერგეი ლავროვისა და ჰილარი კლინტონის პირისპირ შეხვედრის გარდა, კონფერენციის ფარგლებში დღესვე შეხვედრას გამართავენ ამერიკელი სენატორები და რუსეთის დუმის დეპუტატები.
მიუნხენის უსაფრთხოების 46-ე ყოველწლიური კონფერენცია გუშინ გაიხსნა. მას 350-ზე მეტი მაღალი დონის სტუმარი ესწრება, მათ შორის საქართველოს პრეზიდენტი.
კონფერენციაზე განსახილველი საკითხებია: ახალი გამოწვევები, საერთაშორისო უსაფრთხოების პოლიტიკა, მსოფლიო ფინანსური კრიზისი, კიბერ ომი, განიარაღება და ბირთვული იარაღის გაუვრცელებლობა.