"საქართველოს მთავრობა ვანო მერაბიშვილის უბნის ინსპექტორს დაემსგავსა", - ამის შესახებ "ჯი-ეიჩ-ენს" პარლამენტარმა გიორგი ცაგარეიშვილმა გაეროს რეკომენდაციის შეფასებისას განუცხადა.
"საგარეო საქმეთა მინისტრის მოადგილე სერგი კაპანაძემ თქვა, რომ ადმინისტრაციული პატიმრობის ვადის ჩამოწევა არა არის საჭირო და ამას ისე ლაპარაკობდა, თითქოს ადმინისტრაციული სამართლის სპეციალისტი ყოფილიყო. კარგი იქნება, თუ ეს ადამიანი გაარკვევს, ვინ არის - დიპლომატი თუ მერაბიშვილის უბნის ინსპექტორი, თუმცა მთელი მთავრობა, პრემიერ-მინისტრიდან დაწყებული, მინისტრების მოადგილეებით დამთავრებული, მერაბიშვილის უბნის ინსპექტორს დაემსგავსა", - აღნიშნა ცაგარეიშვილმა.
დეპუტატის შეფასებით, გასულ წელს მიღებული კანონი, რომლითაც 60-დღიანი ადმინისტრაციული პატიმრობა 90 დღემდე გაიზარდა, ხელისუფლებამ ოპოზიციის და მათი აქტივისტების დასაშინებლად მიიღო.
შეგახსენებთ, რომ გაერომ საქართველოს ადამიანის უფლების დაცვის კუთხით 163 რეკომენდაცია მისცა. აქედან ქართულმა მხარემ 5 რეკომენდაციის შესრულებაზე უარი თქვა, მათ შორის ადმინისტრაციული პატიმრობის 90 დღიდან 60 დღემდე შემცირებაზე.