ყველაზე დიდი ცინიზმი ის არის, რომ რუსეთის სასტიკი თავდასხმები ხდება ზუსტად იმ მომენტში, როდესაც პრეზიდენტი ტრამპი ყველა ღონეს მიმართავს მშვიდობის მისაღწევად, - ამის შესახებ სოციალურ ქსელში უკრაინის საგარეო საქმეთა მინისტრი ანდრიი სიბიჰა წერს.
მისი თქმით, რუსეთი უკრაინის წინააღმდეგ ტერორის ესკალაციას ახდენს, რასაც უკრაინის მოკავშირეების მხრიდან გადამწყვეტი რეაგირება უნდა მოჰყვეს.
„რუსეთი უკრაინის წინააღმდეგ ტერორის ესკალაციას ახდენს და ამას ჩვენი მოკავშირეების მხრიდან გადამწყვეტი რეაგირება უნდა მოჰყვეს.
პირველად, ღამით, 800-ზე მეტი (!) დრონი და რაკეტა გაუშვეს.
მშვიდობიანი მოსახლეობა დაიღუპა და დაიჭრა, ხოლო სამოქალაქო ინფრასტრუქტურა დაზიანდა კიევში, ოდესაში, კრემენჩუკში, კრივი რიჰში, ზაპოროჟიესა და სხვა ქალაქებში.
სრულმასშტაბიანი ომის დაწყების შემდეგ პირველად, რუსეთმა კიევში უკრაინის მთავრობის შენობა დააზიანა. მხოლოდ ესეც კი სერიოზულ ესკალაციას წარმოადგენს.
ყველაზე დიდი ცინიზმი ის არის, რომ ეს სასტიკი თავდასხმები ხდება ზუსტად იმ მომენტში, როდესაც პრეზიდენტი ტრამპი ყველა ღონეს მიმართავს მშვიდობის მისაღწევად.
მაგრამ ლიდერების შეხვედრაზე დათანხმებისა და საპასუხო რეაგირების ნაცვლად, პუტინი უარყოფს დიპლომატიას და აძლიერებს ტერორს.
მხოლოდ მოსკოვზე ზეწოლას შეუძლია ტერორის ესკალაციის შეჩერება.
რუსული ომის მანქანა ნავთობისა და გაზის შემოსავლებით იკვებება.
ჩვენ მოვუწოდებთ ჩვენს მოკავშირეებს, შეწყვიტონ მისი დაფინანსება, რათა დასრულდეს ომი.
რუსული ტერორიზმის „ანტირეკორდები“ გადამწყვეტ ზომებს მოითხოვს. რუსეთის წინააღმდეგ ახალი მკაცრი სანქციები და უკრაინის პოზიციების გაძლიერება, განსაკუთრებით საჰაერო თავდაცვის სფეროში. ლოდინი შედეგს არ მოიტანს - მოქმედება ახლავეა საჭირო“, - წერს სიბიჰა.
