უკრაინის წინააღმდეგ რუსეთის ომი, შესაძლოა დიდხანს გაგრძელდეს. ამის შესახებ გერმანიის კანცლერმა ფრიდრიხ მერცმა ZDF-თან ინტერვიუში განაცხადა.
შეკითხვაზე იმედოვნებს თუ არა, რომ ცეცხლის შეწყვეტის მიღწევა 2026 წლისთვის იქნება შესაძლებელი, კანცლერმა განაცხადა, რომ არ კარგავს იმედს, თუმცა ილუზიების ტყვეობაშიც არ არის.
„ჩვენ ვცდილობთ, ის, რაც შეიძლება მალე დასრულდეს. თუმცა არა უკრაინის კაპიტულაციის ფასად“, - აღნიშნა მერცმა.
გერმანიის კანცლერის თქმით, ომი, შესაძლოა, ხვალ დამთავრდეს, თუ უკრაინა დანებდება და დაკარგავს დამოუკიდებლობას, მაგრამ ამ შემთხვევაში ომი შემდეგ ქვეყნას დაემუქრება.
გარდა ამისა, მერცმა თქვა, რომ ახლა განიხილება უკრაინისთვის უსაფრთხოების გარანტიები ცეცხლის შეწყვეტის შემთხვევაში.
ამასთან, მან აღნიშნა, რომ მთავრობაში უკრაინაში გერმანული სამხედრო კონტინგენტის განთავსების შესახებ საუბარი არ მიდის.
