უკრაინის შეიარაღებული ძალები რუსეთის ტერიტორიის სიღრმეში ახალი შეტევებისთვის ემზადება. შესაბამისი საშუალებები მომზადებულია. ამის შესახებ უკრაინის პრეზიდენტმა ვოლოდიმირ ზელენსკიმ Facebook-ზე უკრაინის შეიარაღებული ძალების მთავარსარდალის, ალექსანდრ სირსკის მოხსენების შემდეგ დაწერა.
„ჩვენ დეტალურად გავაანალიზეთ ზაპოროჟიეს მიმართულებით არსებული ვითარება და ოკუპანტის განზრახვები. ასევე სუმის ოლქის სასაზღვრო არეალსა და ხარკოვის ოლქში არსებული ვითარება. ჩვენ გავაგრძელებთ აქტიურ მოქმედებებს ზუსტად ისე, როგორც საჭიროა უკრაინის დასაცავად. ძალები და რესურსები მომზადებულია. ასევე დაგეგმილია ახალი ღრმა დარტყმები (DeepStrike) “, - აღნიშნა ზელენსკიმ.
როგორც პრეზიდენტმა აღნიშნა, სირსკის ანგარიში, პირველ რიგში, პოკროვის მიმართულებას ეხებოდა, სადაც რუსული არმია უდიდეს ძალისხმევას ამახვილებს და, შესაბამისად, უდიდეს დანაკარგებს განიცდის.
„ჩვენი დანაყოფები დონეცკის რეგიონში გარკვეული დავალებების შესრულებას აგრძელებენ და მეთოდურად ანადგურებენ ოკუპანტებს. საერთო ჯამში, ფრონტის გასწვრივ, მიმდინარე წლის სულ რაღაც რვა თვეში, რუსებმა 290 ათასზე მეტი ჯარისკაცი დაკარგეს, დაღუპულები და მძიმედ დაჭრილები. მათ ყველაზე დიდი დანაკარგები დონეცკის რეგიონში განიცადეს, სტრატეგიული მიზნების მიღწევის გარეშე. ჩვენი სტაბილიზაციის ზომები ამჟამად ფრონტის ზოგიერთ რაიონში გრძელდება“, - თქვა ზელენსკიმ.
