სასაცილო და სამარცხვინოა, თამარ ჩერგოლეიშვილი მიშა სააკაშვილზე რომ ლაპარაკობს, ლუზერიაო, ეს ადამიანი შეპყრობილია მიხეილ სააკაშვილის სიძულვილით, – ამის შესახებ „ერთიანობა – ნაციონალური მოძრაობის“ პოლიტიკურმა მდივანმა, გიორგი ბარამიძემ „რუსთავი 2“-ის ეთერში განაცხადა.
ბარამიძე გამოეხმაურა „ფედერალისტების“ ერთ-ერთ ლიდერის, თამარ ჩერგოლეიშვილის ფეისბუქპოსტს, რომელშიც ჩერგოლეიშვილმა აღნიშნა: „ნაციონალურმა მოძრაობამ“ რამდენიმე აქტივისტი „დაგაზა“, რომ 31 მარტის ერთსულოვანი სულისკვეთება ჩაშალოს“.
ბარამიძის განცახადებით, არ მიაჩნია მიზანშეწონილად, რომ ჩერგოლეიშვილის დონეზე ვინმე დაეშვას.
"მე მგონი, სასაცილო და სამარცხვინოა, რომ თამარ ჩერგოლეიშვილი მიშა სააკაშვილზე ლაპარაკობს, ლუზერიაო. ეს ადამიანი არის შეპყრობილი მიხეილ სააკაშვილის სიძულვილით და იმდენად მძიმე მდგომარეობაშია, როგორც ჩანს, ფსიქიურად თუ ფსიქოლოგიურად, რომ ამგვარ რაღაცებსაც კადრულობს. ნამდვილად არ მივიჩნევ მიზანშეწონილად, რომ ამ ადამიანის დონეზე ვინმე დაეშვას და მის სისულელეებზე რაიმე კომენტარი გავაკეთო," - აღნიშნა გიორგი ბარამიძემ.
