ევროსაბჭო დღეს საქართველო-რუსეთის საკითხზე იმსჯელებს.
ამჯერად საკითხი მონიტორინგის კომიტეტის ფარგლებში განიხილება. მასზე დეპუტატები იმაზე იმსჯელებენ, რა სახით შევა ევროსაბჭოს საპარლამენტო ასამბლეაში საქართველოსა და რუსეთის შესახებ ინფორმაციები _ იქნება ეს ცალ-ცალკე მოხსენებები, თუ ისევ ერთიანი დოსიე.
მონიტორინგის კომიტეტის სხდომა თბილისის დროით 17:00 საათზე დაიწყება.
აღსანიშნავია ისიც, რომ მონიტორინგის კომიტეტის გუშინდელ სხდომაზე ვენეციის კომისიამ რუსეთის "თავდაცვის შესახებ" კანონი მკაცრად გააკრიტიკა და აღნიშნულთან დაკავშირებით მოხსენებაც კი მოამზადა.
უფრო კონკრეტულად, მოხსენებაში წერია, რომ კანონი, რომელიც მოსკოვს საკუთარი მოქალაქეების დაცვის მოტივით უფლებას აძლევს სამხედრო ოპერაცია სხვა ქვეყნის ტერიტორიაზე განახორციელოს, ეწინააღმდეგება ევროპულ ფასეულობებსა და დემოკრატიის ძირითად მიმართულებებს.
ევროსაბჭოში ფიქრობენ, რომ ამ პოლიტიკის განხორციელება, ანუ საკუთარი მოქალაქეების დაცვა, წარმატებით შეუძლიათ დიპლომატებსაც, რომლებიც ქვეყნებში არიან აკრედიტებულნი.
"ვენეციის კომისიის დასკვნა არის ძალიან პრინციპული და მკაფი. მასში ნეგატიურადაა შეფასებული რუსეთის თავდაცვის კანონი, რომელიც მან საქართველოს წინააღმდეგ 2008 წლის აგვისტოს აგრესიიდან ცოტა ხანში მიიღეს", - განუცხადა ჟურნალისტებს სტრასბურგში მყოფმა, ევროსაბჭოში ქართული დელეგაციის წარმომადგენემა გიორგი კანდელაკმა.
