უკრაინის საგარეო საქმეთა მინისტრმა ანდრეი სიბიჰამ განაცხადა, რომ უკრაინა დაჟინებით მოითხოვს უსაფრთხოების მტკიცე და გრძელვადიან გარანტიებს და არ მიიღებს რაიმე მოთხოვნას, რომელიც მას სუსტსა და დაუცველს გახდის.
სიბიჰა აღნიშნავს, რომ რუსეთის მოთხოვნები და ულტიმატუმები, მრავალი წელია უცვლელი რჩება. კერძოდ, რუსეთს სურს შეზღუდოს უკრაინის არმია, თავდაცვის შესაძლებლობები, პარტნიორების სამხედრო დახმარება და დაბლოკოს უკრაინის ნატო-ში შესვლა.
„ყველა ამ მოთხოვნას აქვს ერთი საერთო: მოსკოვს სურს სუსტი, დაუცველი უკრაინა. ეს არ ეხება ნატო-ს ან „უსაფრთხოების მოსაზრებებს“.
საუბარია რუსეთის უნარზე, მოგვიანებით ეტაპზე გაანადგუროს უკრაინის სახელმწიფო, დაიკავოს მისი ტერიტორიები, ჩაიგდოს მისი მინერალური რესურსები, გამოიყენოს ადამიანური და სხვა პოტენციალი შემდგომი აგრესიისთვის“, - განაცხადა სიბიჰამ.
სიბიჰამ ხაზგასმით აღნიშნა, რომ მოსკოვის რიტორიკა 2022 წლის დონემდე გამწვავდა - რუსეთი ცდილობს ისარგებლოს არსებული გეოპოლიტიკური იმპულსით.
„ჩვენ ვხედავთ რუსეთის ამ სტრატეგიას და არასოდეს მივიღებთ იმას, რაც უკრაინას სუსტს ან დაუცველს ხდის. პირიქით, ჭეშმარიტი და სამართლიანი მშვიდობა მოითხოვს უსაფრთხოების ძლიერ და გრძელვადიან გარანტიებს მის შესანარჩუნებლად“, - განაცხადა სიბიჰამ.
