გერმანიის მთავრობა უკრაინას დამატებით11 მილიარდი ევროს ღირებულების სამხედრო დახმარებას გამოუყოფს.
Reuters-ი ფინანსთა სამინისტროს სახელმწიფო მდივნის სარა რიგლევსკის წერილზე დაყრდნობით წერს, რომ ამის შესახებ ბუნდესტაგის საბიუჯეტო კომიტეტმა ოთხშაბათს, 19 მარტს გერმანიის ფინანსთა სამინისტროს აცნობა.
დოკუმენტიდან ირკვევა, რომ გერმანიის ფინანსთა მინისტრი იორგ კუკისი აპირებს დაამტკიცოს მიმდინარე წლის დაუგეგმავი ხარჯები 2,547 მილიარდი ევროს ოდენობით.
სხვა ფინანსურ წყაროებთან ერთად, არსებული სახსრების ოდენობა 3 მილიარდ ევროს შეადგენს.
გარდა ამისა, Reuters-ის ცნობით, კუკისი აპირებს დაამტკიცოს 2026-2029 წლებში უკრაინის სამხედრო დახმარების დაუგეგმავი ხარჯები 8,252 მილიარდი ევროს ოდენობით, რაც ნიშნავს ამ პერიოდისთვის იარაღის მიწოდების ხელშეკრულებების გაფორმების შესაძლებლობას.
როგორც რიგლევსკი დოკუმენტში აღნიშნავს, უკრაინისთვის სამხედრო დახმარების მიწოდებაზე მიმდინარე წლის პირველ ნახევარში დიდი რაოდენობით ახალი კონტრაქტი უნდა გაფორმდეს.
როგორც Reuters-ი აღნიშნავს, ვითარება ფრონტზე, ასევე უკრაინის მშვიდობიანი მოსახლეობის მდგომარეობა "მნიშვნელოვნად გაუარესდა ბოლო ერთი თვის განმავლობაში".
წერილში აღნიშნულია, რომ ამ ხარჯების დამტკიცების პირობები შესრულებულია. სამინისტრო გეგმის დამტკიცებას საბიუჯეტო კომიტეტს სთხოვს. როგორც Reuters აღნიშნავს, ამ საკითხზე კენჭისყრა შესაძლოა 21 მარტს ჩატარდეს, მოსალოდნელია დადებითი გადაწყვეტილება.
ერთი დღით ადრე გერმანიის კანცლერმა ოლაფ შოლცმა გამოაცხადა უკრაინის სამხედრო დახმარების გაგრძელების შესახებ.
„ჩვენ ორივე ვიზიარებთ მოსაზრებას, რომ უკრაინას შეუძლია ჩვენზე დაყრდნობა, უკრაინას შეუძლია დაეყრდნოს ევროპას, ჩვენ მას არ ვუღალატებთ“, - განაცხადა შოლცმა ბერლინში საფრანგეთის პრეზიდენტ ემანუელ მაკრონთან მოლაპარაკების შემდეგ.
