ამერიკელი რესპუბლიკელი სენატორის, ლინდსი გრემის თქმით, თუ რუსეთის პრეზიდენტი ვლადიმირ პუტინი არ მიიღებს შეთავაზებულ წინადადებას ცეცხლის შეწყვეტის შესახებ, რომელსაც უკრაინა დათანხმდა, დონალდ ტრამპის ადმინისტრაცია „მაქსიმალურ ზეწოლას უნდა დაუბრუნდეს“.
მისივე თქმით, თუკი სამშვიდობო მოლაპარაკებებთან დაკავშირებით ვლადიმირ პუტინი თავისი მიზნებისთვის აშშ-ის პრეზიდენტის, დონალდ ტრამპის, გამოყენებას ცდილობს, "ამას ინანებს".
ამასთანავე, გრემმა აღნიშნა, რომ პრობლემას ვერ მოაგვარებ, თუ იმ პირს არ დაელაპარაკები, ვინც პრობლემას ქმნის. გრემის თქმით, პუტინი მტაცებელია უკრაინისა და ზოგადად რეგიონის მიმართ.
"ვიმედოვნებ, პრეზიდენტ ტრამპს შეუძლია, პუტინი დაარწმუნოს, რომ მოლაპარაკებების მაგიდასთან მივიდეს, ცეცხლის შეწყვეტაში ჩაერთოს და იპოვოს ორმხრივი გამოსავალი, რათა მკვლელობები შეწყდეს“, - თქვა გრემმა.
