შეერთებული შტატების სახელმწიფო მდივნის მარკო რუბიოს განცხადებით, მას არ ჰქონია კონტაქტი უკრაინის პრეზიდენტ ვოლოდიმირ ზელენსკისთან მას შემდეგ, რაც ზელენსკისა და პრეზიდენტ ტრამპს შორის ოვალურ კაბინეტში მწვავე შელაპარაკება მოხდა. ამის შესახებ რუბიომ ტელეარხ ABC-ის ეთერში განაცხადა.
"ჩვენ მზად ვიქნებით ხელახალი ჩართულობისთვის, როდესაც ისინი [უკრაინა] მზად იქნებიან მშვიდობის დასამყარებლად, რაც ცხადია, რომ პრეზიდენტის [ტრამპი] მიზანია", - თქვა რუბიომ. "ის [ტრამპი] ცდილობს, რუსეთი მოლაპარაკებების მაგიდასთან მიიყვანოს, რათა დაინახოს, არის თუ არა გზა ამ კონფლიქტის დასასრულებლად. ეს არის მისი მიზანი... იმედია, მივალთ იმ წერტილამდე, სადაც ეს შესაძლებელი იქნება".
ამავე დროს, მარკო რუბიომ აღნიშნა, რომ არ აქვს დეტალური ინფორმაცია სამშვიდობო გეგმის თაობაზე, რომელიც პარიზმა და ლონდონმა მოამზადეს.
მისივე თქმით, მნიშვნელოვანია რუსეთის პრეზიდენტ ვლადიმირ პუტინის მოლაპარაკებების მაგიდასთან დასმა და ერთადერთი, ვისაც ამის გაკეთება ძალუძს, არის დონალდ ტრამპი.
"ერთადერთი გზა ამ კონფლიქტის დასრულებაზე პუტინის მოლაპარაკების მაგიდასთან დაჯდომაზე გადის. ახლა პრეზიდენტი ტრამპი ერთადერთი ადამიანია დედამიწაზე, რომელსაც აქვს შანსი, აიძულოს იგი [პუტინი] დაჯდეს მაგიდასთან და დაინახოს, რამდენად არის მზად ომის დასასრულებლად", - თქვა მან.
მარკო რუბიოს თქმით, ცეცხლის შეწყვეტის პირობები უნდა იყოს მტკიცე და უსაფრთხოების გარანტებიც უნდა არსებობდეს, თუმცა უპირველესად, მშვიდობა უნდა იქნეს მიღწეული.
