უკრაინის პრემიერ-მინისტრმა დენის შმიჰალმა განაცხადა, რომ კიევი არ განიხილავს შეერთებულ შტატებთან წიაღისეულის შეთანხმების გაფორმებას უსაფრთხოების გარანტიებთან გარეშე. მისივე თქმით, ეს უკვე შედის შეთანხმების პროექტში.
შმიჰალის განცხადებით, უკრაინის მთავრობა 26 თებერვალს გამართულ შეხვედრაზე განიხილავს შეერთებულ შტატებთან გასაფორმებელი წიაღისეულის შეთანხმების ტექსტს.
„ჩვენ არ განვიხილავთ რაიმე ხელშეკრულების გაფორმებას უსაფრთხოების გარანტიების გარეშე... ეს შეთანხმება პირდაპირ არის დაკავშირებული უსაფრთხოების გარანტიებთან. არც უკრაინის პრეზიდენტი და არც უკრაინის მთავრობა არ განიხილავენ ამ შეთანხმებას და მის ხელმოწერას უკრაინის უსაფრთხოების გარანტიებისგან იზოლირებულად“, - თქვა შმიჰალმა.
შმიჰალმა განაცხადა, რომ უკრაინამ და შეერთებულმა შტატებმა მოამზადეს ეკონომიკური თანამშრომლობის შესახებ შეთანხმების პროექტი, რომელიც ცნობილია როგორც „წიაღისეულის შეთანხმება“ და ეს არის წინასწარი შეთანხმება უკრაინის აღდგენისთვის საინვესტიციო ფონდის შექმნის შესახებ.
„მე-10 პუნქტში ფაქტობრივად ნათქვამია, რომ ფონდის შესახებ ეს შეთანხმება წარმოადგენს ორმხრივი და მრავალმხრივი შეთანხმებების არქიტექტურის განუყოფელ ელემენტს, ასევე კონკრეტულ ნაბიჯებს ხანგრძლივი მშვიდობის დასამყარებლად და ეკონომიკურად უსაფრთხო სტაბილურობის გასაძლიერებლად“, - განაცხადა შმიჰალმა.
