შეშინებული, უსუსური ხელისუფლების ერთადერთი მაშველი რგოლი ახლა არის ძალადობა, - პარტია "საქართველოსთვის" ლიდერმა, გიორგი გახარიამ განაცხადა. გახარიამ კომენტარი გააკეთა რუსთაველის გამზირზე თანაპარტიელის ლევან გოგიჩაიშვილის დაკავებასთან დაკავშირებით.
გახარიამ ჟურნალისტებს განუცხადა, რომ ოპოზიციონერი პოლიტიკოსისთვის ძალისმიერი მეთოდებით ხელბორკილების დადება "ქართული ოცნების" შეშინებულ და უსუსურ სახეს აჩევენებს.
„შეშინებული, უსუსური ხელისუფლებაა, რომლის ერთადერთი მაშველი რგოლი ახლა არის ძალადობა. ასეთ ხელისუფლებას ვხედავთ, ამიტომ ჩვენ, ყველანი გავაკეთებთ ყველაფერს იმისთვის, რომ ბიძინა ივანიშვილმა დაკარგოს ფული, რაც ყველაზე მნიშვნელოვანია მისთვის, დაკარგოს ძალაუფლება, რომ არ ჰქონდეს შესაძლებლობა ასე იძალადოს საქართველოს მოქალაქეებზე, განსაკუთრებით ისე, რასაც აკეთებს არჩევნების შემდგომ.
ეს არის ფიზიკური ძალადობა მოქალაქეებზე, მხოლოდ და მხოლოდ იმიტომ, რომ მათ განსხვავებული აზრი აქვთ და არ ეშინიათ აზრის გამოხატვა. ლევანი ებრძოდა "ნაციონალური მოძრაობის" რეჟიმს, ლევანი გააგრძელებს ბრძოლას "ოცნების" რეჟიმთან. ჩვენ, ყველა გავაგრძელებთ ბრძოლას. ჩვენ გვინდა ნორმალურ, სამართლიან, ევროპულ ქვეყანაში ცხოვრება", - განაცხადა გიორგი გახარიამ.
