ქართულმა მხარემ გაეროს გენერალურ მდივან პან გი მუნს აფხაზეთსა და ე.წ. სამხრეთ ოსეთში არსებული ვითარება გააცნო.
საქართველოს ოკუპირებულ რეგიონებში არსებული სიტუაციის შესახებ გაეროს გენმდივანს დეტალური ინფორმაცია პრემიერ-მინისტრმა ნიკა გილაურმა აბუ-დაბიში გამართულ შეხვედრაზე მიაწოდა.
გარდა ამისა, როგორც პრემიერის პრესსამსახურის უფროსმა ნიკო მჭედლიშვილმა "ჯი-ეიჩ-ენს" განუცხადა, შეხვედრაზე გილაურმა პან გი მუნს იმ საქმისთვის, რასაც ორგანიზაცია ოკუპირებულ რეგიონებში მცხოვრები მოსახლეობისთვის აკეთებს, მადლობაც გადაუხადა.
"საქართველოს პრემიერ-მინისტრმა გაეროს გენერალურ მდივანს აფხაზეთსა და ცხინვალის რეგიონში არსებული ვითარება დეტალურად გააცნო. ამასთან, მან პან გი მუნს მადლობაც გადაუხადა იმ საქმისთვის, რასაც ეს ორგანიზაცია ოკუპირებულ ტერიტორიებზე აკეთებს", - განაცხადა მჭედლიშვილმა.
შეგახსენებთ, რომ ნიკა გილაურის არაბეთის გაერთიანებული ემირატების დედაქალაქში ვიზიტი 17 დაიწყო და 21 იანვრამდე გასტანს. გილაური აბუ დაბიში ვიზიტის ფარგლებში უკვე დაესწრო მე-4 საერთშორისო სამიტს, სახელწოდებით "მომავლის ენერგია", რომელზეც სიტყვითაც გამოვიდა.
აღნიშნულის გარდა, საქართველოს პრემიერ-მინისტრი არაბეთის გაერთიანებულ საემიროების პრემიერ-მინისტრს, შეიხ მოჰამედ ბინ ალ მაკტუმს, საგარეო საქმეთა მინისტრს, შეიხ აბდულა ბინ სულთან ალ ნაიანს და უმაღლესი განათლების მინისტრს, შეიხ ნაიან ბინ მუბარაკ ალ ნაიანს შეხვდება.