საქართველოს პრეზიდენტი მიხეილ სააკაშვილი სომეხ კოლეგასთან შეხვედრაზე "ყველა საკითხის კეთილმეზობლური ურთიერთობის კონტექსტში განხილვას" აპირებს.
ასე უპასუხა პრეზიდენტის პრესსპიკერმა მანანა მანჯგალაძემ "ჯი-ეიჩ-ენის" შეკითხვას იმასთან დაკავშირებით, დასვამს თუ არა მიხეილ სააკაშვილი სერჟ სარქსიანთან დაგეგმილ შეხვედრაზე ქართული ბრენდების დაცვის საკითხს.
"სომხეთი არის ჩვენი მეზობელი, რომელთანაც კეთილმეზობლურ ურთიერთობას ვაწარმოებთ. შესაბამისად, ყველა საკითხი ამ კონტექსტში იქნება განხილული", - განაცხადა მანანა მანჯგალაძემ.
შეგახსენებთ, რომ საქართველოს პრეზიდენტი მიხეილ სააკაშვილი სომხეთში წლის პირველი ოფიციალური ვიზიტით 22-23 იანვარს გაემგზავრება. ოფიციალური ინფორმაციით, ორი ქვეყნის პირველი პირები ორმხრივი ურთიერთობების გაუმჯობესების საკითხებზე ისაუბრებენ.
შეგახსენებთ იმასაც, რომ საფრანგეთში მცხოვრებმა ქართველმა ემიგრანტებმა, მაღაზიებში ქართული პროდუქცია სომხური წარწერებით აღმოაჩინეს. მათივე ინფორმაციით, საფრანგეთში ქართული ხაჭაპური "ხაჩატურიანის" სახელით, ჩურჩხელა "არმიანსკოე ჩუდოს" სახელწოდებით, ხოლო ქართული "საფერავის" ნაცვლად, სომხური "საფერავი" იყიდება.