საქართველოს პრეზიდენტი მიხეილ სააკაშვილი ეთნიკურ ქართველებთან დაკავშირებით რუსულ-აფხაზური კომისიის მიერ მიღებულ გადაწყვეტილებას "ცინიკურად" აფასებს.
"ეს არის ცინიკური გადაწყვეტილება, რაც 21-ე საუკუნისთვის სრულიად მიუღებელია. ძნელია ის მარიონეტული რეჟიმის გადაწყვეტილებად ჩაითვალოს, რადგან, სინამდვილეში მას მოსკოვი იღებს", - ქვეყნის პირველი პირის ეს პოზიცია ჟურნალისტებს დღეს გამართულ ბრიფინგზე მისმა პრესსპიკერმა მანანა მანჯგალაძემ გააცნო.
ამასთან, მანჯგალაძის განმარტებით, საქართველოს პრეზიდენტი მიიჩნევს, რომ ეთნიკური ქართველების ქონებრივი დავების განხილვაზე უარის თქმის გადაწყვეტილება ნათლად აჩვენებს, თუ როგორი სამართლებრივი ნორმები მოქმედებს რუსეთში და როგორ იცავს მოსკოვი ფედერაციაში მცხოვრები ეთნიკური უმცირესობების, ამ შემთხვევაში კი, ქართველების უფლებებს.
"ეს გადაწყვეტილება ადასტურებს, თუ როგორ ხდება რუსეთში ეთნიკური ნიშნით მოქალაქეების დისკრედიტაცია და რამდენად ეწინააღმდეგება ეს პოლიტიკა საერთაშორისო სამართლებრივ და ადამიანის უფლებათა სამართლის სტანდარტებს. თუმცა, აქვე უნდა აღინიშნოს, რომ ნებისმიერი გადაწყვეტილება, რომელსაც ოკუპანტი მხარე იღებს, სამართლებრივ საფუძვლებს მოკლებულია", - მიიჩნევს საქართველოს პრეზიდენტი.
შეგახსენებთ, რომ გასულ კვირას რუსულ-აფხაზურმა კომისიამ გადაწყვეტილება მიიღო ეთნიკური ქართველების ქონებრივი პრეტენზიები არ განიხილოს.
