ქართველი თავისუფალი სტილით მოჭიდავე ავთანდილ კენჭაძე მსოფლიოს ჩემპიონია
ალბანეთის დედაქალაქ ტირანაში არაოლიმპიურ წონით კატეგორიებში მსოფლიოს ჩემპიონატი მიმდინარეობს. მსოფლიოს ჩემპიონობა იზეიმა ავთანდილ კენჭაძემ (79 კგ). ქართველმა თავისუფალი სტილით მოჭიდავემ ფინალში ნეიტრალური დროშის ქვეშ მოასპარეზე მაგომედ მაგომაევი ანგარიშით 13:4 დაამარცხა.
ფინალამდე ავთანდილ კენჭაძემ თურქ, იაპონელ, ყაზახ სპორტსმენებს სძლია, ნახევარფინალში კი ირანელ მოჭიდავესთან ორთაბრძოლაში გაიმარჯვა.
ჩემპიონატზე ვერცხლის მედალი მოიპოვა მირიან მაისურაძემ (92 კგ). ქართველმა მოჭიდავემ ფინალური შეხვედრა ნეიტრალური დროშის ქვეშ მოასპარეზე ორგზის ოლიმპიურ და ხუთგზის მსოფლიოს ჩემპიონ აბდულრაშიდ სადულაევთან დათმო.
ფინალამდე მირიან მაისურაძემ ინდოელ და სლოვაკ სპორტსმენებს სძლია, ნახევარფინალში კი იტალიელ მოჭიდავესთან ორთაბრძოლაში გაიმარჯვა.
