"ქართული პარტიის" თანათავმჯდომარე ლევან გაჩეჩილაძე სამეგრელოს რეგიონში მოსახლეობას ხვდება და მათ პრობლემებს ადგილზე ეცნობა. იგი აბაშაში, სენაკსა და ზუგდიდში იმყოფებოდა.
როგორც "ქართული პარტიის" პრესსამსახურში აცხადებენ, აბაშელების თქმით, რაიონში მოუგვარებელია სოციალური და ჯანდაცვის საკითხები. მოსახლეობა აცხადებს, რომ ხალხში არსებობს შიშის სინდრომი, რასაც, ძირითადად, საინფორმაციო ვაკუუმში ყოფნა განაპირობებს.
"ლევან გაჩეჩილაძესთან საუბრისას, აბაშის მოსახლეობა აღნიშნავდა, რომ ასეთი მძიმე მდგომარეობა არ იქნებოდა, ხელისუფლების კონტროლს დაქვემდებარებულ მედიასაშუალებებთან ერთად, დამოუკიდებელი ტელეარხებიც რომ ფუნქციონირებდნენ", _ აცხადებენ "ქართული პარტიის" პრესსამსახურში.
ლევან გაჩეჩილაძე სენაკის საკოლმეურნეო ბაზარში ინდმეწარმეებს შეხვდა და მათი პრობლემების შესახებ დეტალური ინფორმაცია მიიღო. როგორც "ქართული პარტია" იუწყება, შეხვედრის დროს აღინიშნა, რომ ფასების ზრდა და ინფლაცია მოსახლეობას გამოუვალ მდგომარეობაში აყენებს. ყურადღება არ ექცევა სოფლის მეურნეობის განვითარებას, დაუმუშავებელია სასოფლო-სამეურნეო სავარგულები, რაც საწვავის სიძვირითა და ტექნიკის უქონლობით არის განპირობებული.