საგარეო საქმეთა სამინისტრო ყარაბაღის პრობლემის მოგვარებაში შუამავლის როლის შესრულებასთან დაკავშირებით მზადყოფნას უარყოფს.
"საქართველოს საგარეო საქმეთა მინისტრის განცხადება არ მომისმენია, მაგრამ ჩემი ინფორმაციით, მასში მედიატორის როლზე საუბარი არ ყოფილა", - განუცხადა საგარეო საქმეთა მინისტრის მოადგილემ ნინო კალანდაძემ ჟურნალისტებს გრიგოლ ვაშაძის მიერ აზერბაიჯანული ტელეკომპანიებისთვის მიცემულ ინტერვიუზე კომენტირებისას.
ამასთან, კალანდაძის განმარტებით, ყველა კონფლიქტური კერა რეგიონის უსაფრთხოებას საფრთხეს უქმნის და შესაბამისად, რაც უფრო სწრაფად გადაიჭრება ის, მით უკეთესია.
"სწორედ ამაზე ისაუბრა მინისტრმა", - განმარტა ვაშაძის მოადგილემ.
შეგახსენებთ, რომ აზერბაიჯანული მედიის ინფორმაციით, საქართველოს საგარეო საქმეთა მინისტრმა გრიგოლ ვაშაძემ მათთან საუბარში განაცხადა, რომ თბილისი მზადაა ყარაბახის პრობლემის მოგვარებაში შუამავლის როლი შეასრულოს.
