ევროსაბჭოს საპარლამენტო ასამბლეის მონიტორინგის კომიტეტის დღევანდელ სხდომაში ქართული მხარე მონაწილეობას არ მიიღებს.
ამის შესახებ ჟურნალისტებს საქართველოს საგარეო საქმეთა მინისტრის მოადგილემ ნინო კალანდაძემ განუცხადა. როგორც მან აღნიშნა, ქართულმა მხარემ კომიტეტის სხდომაში მონაწილეობის მიღება არამიზანშეწონილად მიიჩნია.
"საქართველოს დელეგაცია ამ სხდომაში მონაწილეობას არ მიიღებს. მიუხედავად იმისა, რომ ევროსაბჭოს საპარლამენტო ასამბლეას სამი სერიოზული რეზოლუცია აქვს მიღებული, რომლითაც ის რუსეთს ვალდებულებების შესრულებისკენ მოუწოდებს, მოსკოვს ის არ გაუთვალისწინებია. მეტიც, არა თუ არ შეუსრულებია ნაკისრი ვალდებულება, პირიქით - ვითარება გაუარესებულია. რამდენადაც საქართველოსთვის ამ ვალდებულების იმპლემენტაციაა პრიორიტეტული, ვფიქრობთ, რომ ამ ეტაპზე კომიტეტის სხდომაში მონაწილეობა არამიზანშეწონილი იქნება", - განმარტა კალანდაძემ, რომლის თქმითაც, სხვა საკითხებთან მიმართებაში საქართველო ევროსაბჭოს საპარლამენტო ასამბლეასთან კარგად და კონსტრუქციულად თანამშრომლობს.
შეგახსენებთ, რომ დღეს ევროსაბჭოს საპარლამენტო ასამბლეის მონიტორინგის კომიტეტის სხდომა გაიმართება, რომელზეც რუსეთ-საქართველოს ომის შემდგომი პერიოდი, ასამბლეის მიერ მიღებული რეზოლუციების შესრულების საკითხი და საქართველო-რუსეთის სამომავლო ურთიერთობები განიხილება.
