ოფიციალური თბილისის მტკიცებით, სააკაშვილი-ობამას შეხვედრისას შეერთებული შტატების მიერ საქართველოსთვის შეირაღების მიწოდების შესახებ საუბარი არ ყოფილა.
"კონკრეტულად იმ საკითხზე, რომელზეც გაზეთი "კომერსანტი" წერს, ორი ქვეყნის პრეზიდენტების შეხვედრაზე დეტალური საუბარი არ ყოფილა", - განუცხადა საგარეო საქმეთა მინისტრის მოადგილემ ნინო კალანდაძემ ჟურნალისტებს აღნიშნულ საკითხზე საუბრისას.
მისი ინფორმაციით, ბარაკ ობამამ და მიხეილ სააკაშვილმა საქართველო-აშშ-ის ქარტიით გათვალისწინებულ პრიორიტეტულ საკითხებზე ისაუბრეს, მათ შორის უსაფრთხოების პროექტებზე, თუმცა, კონკრეტულად საქართველოს შეიარაღებით უზრუნველყოფაზე ყურადღება არ გამახვილებულა.
"განიხილეს ქარტიით გათვალისწინებული ყველა პრიორიტეტული საკითხი, მათ შორის ეკონომიკური პროექტები. საუბარი შეეხო ორ ქვეყანას შორის სავაჭრო ურთიერთობების გაღრმავებას და უსაფრთხოების საკითხებსაც", - აღნიშნა კალანდაძემ.
როგორც კალანდაძემ აღნიშნა, პრეზიდენტმა ობამამ დავალება გასცა, რომ საქართველოს პრეზიდენტის მიხეილ სააკაშვილის მიერ დასმულ პრობლემურ საკითხებს განსაკუთრებული ყურადღება მიექცეს.
შეგახსენებთ, რომ საქართველოსა და ამერიკის შეერთებული შტატების პრეზიდენტების შეხვედრა ვაშინგტონში, 15 იანვარს გაიმართა. გაზეთ "კომერსანტის" მტკიცებით, მასზე მიხეილ სააკაშვილმა ამერიკელ კოლეგას საქართველოს შეიარაღებით დახმარება სთხოვა.