“სახელი, გვარი, პირადობის ნომერი, დაბადების თარიღი, ასეთი ინფორმაციის მოთხოვნა პირისთვის იწვევს საფუძვლიან ეჭვს, რომ ამ მონაცემების გამოყენებას ცდილობს კონკრეტული პირი არჩევნებზე მანიპულაციებისთვის.” - ამის შესახებ ცენტრალური საარჩევნო კომისიის წევრმა ოპოზიციიდან, ანა კობახიძემ საგანგებოდ გამართულ ბრიფინგზე განაცხადა.
კობახიძე ცესკოს კონკრეტული დარღვევების აღმოფხვრისა და საინფორმაციო კამპანიის ჩატარებისკენ მოუწოდებს და აღნიშნავს, რომ მუნიციპალიტეტებში არაფორმალური ჯგუფები ამომრჩეველთა ნების ცვლილებას ცდილობენ:
“გვაქვს ინფორმაცია სხვადასხვა მუნიციპალიტეტის საკრებულოებისა და გამგეობების თანამშრომლებისგან, რომ მათი უშუალო ხელმძღვანელები და ასევე გამგეობაში შექმნილი არაფორმალური ჯგუფები, სთხოვენ თანამშრომლებს თავიანთ პირადობის დამადასტურებელ დოკუმენტს, იწერენ მათ პირად მონაცემებს, რაც არის სისხლის სამართლის დანაშაული. ამ საკითხზე დავიწყეთ მუშაობა და დეტალურად შევისწავლით თითოეულ მუნიციპალიტეტს, იქამდე კი მინდა, გავაფრთხილო და მოვუწოდო საჯარო სამსახურის თანამშრომლებს და მათ ხელმძღვანელებს, რომ ასეთი ქმედება არის სისხლის სამართლის დანაშაული.
განსაკუთრებით იმ პირადი სახის ინფორმაციის გადაცემა, რომელიც შეყვანილია ამომრჩეველთა ერთიან სიაში, ვგულისხმობ, სახელი, გვარი, პირადობის ნომერი, დაბადების თარიღი, ასეთი ინფორმაციის მოთხოვნა პირისთვის იწვევს საფუძვლიან ეჭვს, რომ ამ მონაცემების გამოყენებას ცდილობს კონკრეტული პირი არჩევნებზე მანიპულაციებისთვის.
ასევე, სისხლის სამართლის დანაშაულია დოკუმენტის ჩამორთმევა, რის შემდეგაც ამომრჩეველს არ ექნება შესაძლებლობა მიიღოს არჩევნებში მონაწილეობა.
პარალელურად, ცენტრალურ საარჩევნო ადმინისტრაციას ვთხოვ ჩაატაროს მკაცრი ინფორმირების კამპანია, იმასთან დაკავშირებით, რომ ამომრჩეველმა არასდროს უნდა გაუზიაროს ინფორმაცია სხვა პირს, რა ინფორმაციაც არის საარჩევნო სიებში და არის პირის პერსონალური ინფორმაცია.
მეორე საკითხი ეხება დოკუმენტებს. ამომრჩეველს მინდა მოვუწოდო, რომ შეამოწმოს მათი დოკუმენტების ვალიდურობა, ხომ არ აქვს ვადა გასული მათ პირადობის მოწმობას ან პასპორტს, რომლითაც ისინი აპირებენ არჩევნებში მონაწილეობას, რადგან ძალიან ცოტა დრო რჩება იმისთვის, რომ ახალი დოკუმენტის დამზადების შემდეგ ისინი აღმოჩნდნენ საარჩევნო სიაში, ამიტომ რაც შეიძლება სწრაფად, 2-3 დღის ფარგლებში უნდა შეცვალონ ვადაგასული ID ან პასპორტი.
და მესამე, თითოეულ ამომრჩეველს იმისთვის, რომ ინფორმირებული იყვნენ არჩევნების დღეს, ვთხოვ გადაამოწმონ თავი ამომრჩეველთა ერთიან სიაში და თუ არ აღმოჩნდებიან ერთიან სიაში, სწრაფად დაიწყონ ამ საკითხის მოგვარება, როგორც იუსტიციის სახლში, ისე ცენტრალურ საარჩევნო კომისიაში.” - განაცხადა კობახიძემ
