"სამართლიანი საქართველოს" წევრები ნოღაიდელისგან მათ წინაშე არსებული დავალიანების ამოღებას სასამართლოს გზით შეეცდებიან.
უახლოეს ხანში ნოღაიდელის მოძრაობის ყოფილი წევრები სასამართლოს მიმართავენ და ნოღაიდელის მიერ მათთვის გადაუხდელი ნაკისრი თანხის ამოღებას მოითხოვენ. ამის შესახებ "ჯი-ეიჩ-ენს" ამავე მოძრაობის გამგეობის წევრმა ნატო ხოხიაშვილმა განუცხადა.
"იმდენი ქონება აქვს ნოღაიდელს, რომ 650 ათასი ლარის ოდენობით
ჩვენი დავალიანების გასტუმრება არ გაუჭირდება," _ აღნიშნა ხოხიაშვილმა.
მისი თქმით, გუშინ ტელეკომპანია "მაესტროს" ეთერით ზურაბ ნოღაიდელმა ბოლოსდაბოლოს აღიარა წინასაარჩევნოდ სააგიტაციო და კარდაკარის მიზნით საკუთარი აქტივისტების მიერ გაწეული დავალიანება, თუმცა მათი გადახდა "სამართლიანი საქართველოს" გამგეობის ამჟამინდელ თავმჯდომარეს სერგო ჯავახაძეს დააკისრა.
ამასთან, ნატო ხოხიაშვილის თქმით, პოლიტიკური მოძრაობა "სამართლიანი საქართველოს" წევრები ახალი ოფისის დაქირავებას აპირებენ.
ხოხიაშვილი აცხადებს, რომ მათი ოფისი მოკრძალებული იქნება და არა ისეთი პომპეზური, როგორიც ზურაბ ნოღაიდელს ჰქონდა.
შეგახსენებთ, ნოღაიდელის პოლიტიკური მოძრაობის ყოფილი ოფისი ლვოვის ქუჩა # 56-ში გახლდათ განთავსებული. "სამართლიანი საქართველოს" წევრებმა ჭადრაკის სახალეში ჩატარებულ რიგგარეშე ყრილობაზე მიიღეს გადაწყვეტილება, რომლის თანახმადაც ზურაბ ნოღაიდელმა მოძრაობის თავმჯდომარის პოსტი უნდა დატოვოს.