ყველა პრობლემის მიუხედავად, რომელსაც აშშ საზღვარგარეთ აწყდება, საქართველოს საკითხი ამერიკაში კვლავ აღელვებთ. ამის შესახებ ბი-ბი-სისთვის მიცემულ ინტერვიუში საქართველოს პრეზიდენტმა მიხეილ სააკაშვილმა განაცხადა.
პრეზიდენტის თქმით, ამერიკისთვის საქართველო ძალიან მიშვნელოვანი სტრატეგიული ქვეყანაა და ქართული მხარისთვის აუცილებელია, აშშ-მ არ მოადუნოს ყურადღება საქართველოსთან მიმართებით.
ბი-ბი-სის ჟურნალისტის კითხვაზე, ხომ არ გაართულებს საქართველოს ხელისუფლების შემდგომ ურთიერთობებს აშშ-სთან ის ფაქტი, რომ ამერიკის ყურადღება ახლა უფრო მეტად რუსეთს ეთმობა.
სააკაშვილის პასუხით, რუსეთთან მიმართებით არანაირი ილუზია არ არსებობს.
"ვფიქრობ, ამ ქალაქში არანაირი ილუზია რუსეთთან მიმართებით არ არსებობს. რა თქმა უნდა, არსებობს სურვილი, რომ მნიშვნელოვან საკითხებში რუსეთიც იყოს ჩართული. ეს ჩვენთვის სრულიად ცხადია. თუმცა მეორე მხრივ, ჩვენს შემთხვევაში, რუსეთი აგრძელებს ჩვენი ტერიტორიებს 20%-ის ოკუპირებას. გვყავს 500 ათასი იძულებით გადადგილებული პირი. რუსები არ აღიარებენ ჩვენს საზღვრებს, მთავრობას, უფრო მეტიც, ისინი არ აღიარებენ ცეცხლის შეწყვეტის შესახებ იმ შეთანხმებას, რომელსაც თავად მოაწერეს ხელი", _ განაცხადა სააკაშვილმა.