პარლამენტის თავმჯდომარის დავით ბაქრაძის შეფასებით, ეთნიკურ ქართველებთან დაკავშირებით რუსულ-აფხაზური ე.წ. კომისიის მიერ მიღებული გადაწყვეტილება მოსკოვისა და სოხუმის ლიდერების "ხასიათსა და ბუნებას" კიდევ ერთხელ ადასტურებს.
"ეს კიდევ ერთხელ ადასტურებს მოსკოვისა და სოხუმის ლიდერების ხასიათსა და ბუნებას, რაც ქართველების ეთნიკურ წმენდაში გამოიხატება. ისინი ადამიანებს ეთნიკური ნიშნით ყოფენ", - განუცხადა ბაქრაძემ ჟურნალისტებს ე.წ. კომისიის მიერ მიღებულ გადაწყვეტილებაზე კომენტირებისას.
ამასთან, პარლამენტის თავმჯდომარე უკანონობად აფასებს ქონების დაბრუნების საკითხის საქართველოს დეოკუპაციამდე განხილვასაც და აცხადებს, რომ ამ თემაზე მხოლოდ ტერიტორიული მთლიანობის აღდგენის შემდეგ შეიძლება საუბარი.
"ზოგადად ქონების დაბრუნების პროცესიც არის სრულიად უკანონო, რადგან აფხაზეთში, რომელიც საქართველოს ოკუპირებული ტერიტორიაა და სადაც ქართველების მასობრივი წმენდა განხორციელდა, ქონების განაწილებაზე საუბარი დეოკუპაციამდე არ შეიძლება იყოს. აღნიშნული კომისიის გადაწყვეტილება კი ამ უკანონობაში მიღებული კიდევ ერთი უკანონობაა", - განმარტა საქართველოს პარლამენტის სპიკერმა.
შეგახსენებთ, რომ რუსეთ-აფხაზეთის ე.წ. კომისიამ ეთნიკურად ქართველების ქონებრივი პრეტენზიების განხილვაზე უარი თქვა. ეს იმ ქართველებსაც შეეხება, რომლებიც ამჟამად რუსეთის მოქალაქეები არიან. აღნიშნულთან დაკავშირებით რუსეთის საგარეო საქმეთა მინისტრმა სერგეი ლავროვმა განაცხადა, რომ მოსკოვი განურჩევლად ეთნიკური ნიშნისა რუსეთის მოქალაქეების უფლებებს დაიცავს.