ამერიკის პრეზიდენტმა ჯო ბაიდენმა განაცხადა, რომ შეერთებულ შტატებსა და უკრაინას შორის უსაფრთხოების ორმხრივი შეთანხმება ხელს შეუწყობს უკრაინის ძალების თავდაცვისუნარიანობის გაძლიერებას, მაგრამ არ არის საუბარი ამერიკული ჯარების შესაძლო გაგზავნაზე.
ამის შესახებ მან ვოლოდიმირ ზელენსკისთან ერთობლივ პრესკონფერენციაზე უსაფრთხოების შეთანხმების ხელმოწერის შემდეგ განაცხადა.
ბაიდენის თქმით, შეთანხმების მიზანია „გრძელვადიან პერსპექტივაში უკრაინის საიმედო თავდაცვისა და შეკავების შესაძლებლობების გაძლიერება“.
„აშშ დაეხმარება ორივე ამ მიზნის განხორციელებაში - არა უკრაინაში ჯარების გაგზავნით, არამედ იარაღითა და საბრძოლო მასალის მიწოდებით, დაზვერვის მონაცემების გაზიარების გაფართოებით, მამაცი უკრაინელი სამხედროების შემდგომი წვრთნით შეერთებულ შტატებსა და ევროპაში, ჩვენი ჯარების თავსებადობის გაძლიერებით. ინვესტიციით უკრაინის თავდაცვის ინდუსტრიაში“, - განაცხადა ბაიდენმა.
აშშ-ის ლიდერმა აღნიშნა, რომ შეთანხმება ასევე ითვალისწინებს ამერიკული მხარის მონაწილეობას ეკონომიკის აღდგენაში, გააძლიერებს სამართლიანი სამყაროს ხედვას, რომელიც დაფუძნებულია "მშვიდობის ფორმულაზე" და ასევე ხელს უწყობს უკრაინის ინტეგრაციას ევროატლანტიკურ საზოგადოებაში.
ბაიდენმა ხაზგასმით აღნიშნა, რომ შეერთებული შტატები გააგრძელებს რუსეთზე ზეწოლას, სანამ ის არ შეწყვეტს აგრესიას. მან ამ კონტექსტში ახსენა აშშ-ის უახლესი სანქციები და G7-ის გადაწყვეტილება რუსული აქტივების გამოყენების შესახებ.
