გასულ ღამეს რუსეთმა კიევის წინააღმდეგ მასირებული შეტევა განახორციელა. ოკუპანტებმა თავდასხმისას უპილოტო საფრენი აპარატები გამოიყენა. გავრცელებული ცნობით, დაღუპულია სულ მცირე ერთი ადამიანი.
კიევის სამხედრო ადმინისტრაციის ინფორმაციით, ეს იყო ირანული Shahed-ის ტიპის დრონებით განხორციელებული ყველაზე დიდი შეტევა დედაქალაქზე, სრულმასშტაბიანი ომის დაწყებიდან დღემდე.
უკრაინის შეიარაღებული ძალების ინფორმაციით, რუსეთის ძალებმა 54 Shahed-ის ტიპის დრონი გაუშვეს, რაც რეკორდული რაოდენობაა ომის დაწყებიდან დღემდე. უწყების მონაცემებით, უკრაინის საჰაერო თავდაცვამ 52 უპილტო საფრენი აპარატი ჩამოაგდო, დრონების ნამსხვრევების ჩამოცვენას კი ნგრევა და მსხვერპლი მოჰყვა სხვადასხვა ადგილას.
უკრაინული მედიის ცნობით, დაზიანდა 7-სართულიანი არასაცხოვრებელი შენობა და დაიღუპა ერთი ადამიანი, კიდევ ერთი კი — საავადმყოფოში გადაიყვანეს.
რამდენიმე ადგილას, მათ შორის, სავაჭრო ცენტრის სახურავზე, ხანძარი გაჩნდა.
ბოლო პერიოდში, რუსეთის ძალების მიერ კიევზე თავდასხმები გახშირდა. სამხედრო ადმინისტრაციის ცნობით, გასული ღამის თავდასხმა მეთოთხმეტე იყო მაისის დასაწყისიდან დღემდე.