პარლამენტმა დღეიდან უკვე დაიწყო "ქართული დასის" საკანონმდებლო ინიციტივების განხილვა, რომელიც სისხლის სამართლის კოდექსის ლიბერალიზაციას ითვალისწინებს.
სისხლის სამართლის კოდექსში შესატანი ცვლილებები პატიმართა პირობით ვადაზე ადრე გათავისუფლების ვადების შემცირებას ითვალისწინებს. ამის თაობაზე "ქართული დასის" ლიდერმა, პარლამენტის წევრმა ჯონდი ბაღათურიამ პარლამენტში გამართულ ბრიფინგზე განაცხადა.
"ქვეყანაში სისხლის სამართლის პოლიტიკა ზედმეტად მკაცრია, რაც პატიმართა რიცხოვნობის არაბუნებრივ ზრდას იწვევს. ამ პრობლემის გადაჭრის მიზნით, "ქართულმა დასმა" შეიმუშავა ახალი საკანონმდებლო ინიციატივა, რომელიც პატიმართა პირობით ვადაზე ადრე გათავისუფლების ვადების შემცირებას გულისხმობს და ციხეების განტვირთვის ერთ-ერთ მნიშვნელოვან გზად გვესახება", - განაცხადა ბაღთურიამ.
პარლამენტის წევრის თქმით, მართალია, უკვე შექმნილია პატიმართა პირობით ვადაზე ადრე გათავისუფლებისთვის (ე. წ. "უდო") მარტივი, გამჭვირვალე და სამართლიანი სამართლებრივი ბაზა, რამაც დადებითი შედეგები მოიტანა, თუმცა ამ მიმართულებით რეფორმის გაგრძელება საჭიროა და ეს "უდოს" ვადების შემცირებით უნდა მოხდეს.
ბაღათურიას განცხადებით, ბევრ პატიმარს ოჯახებში უფრო ადრე დაბრუნების შანსი მიეცემა, რაც ამავდროულად მნიშვნელოვნად მოხსნის ციხეების გადატვირთულობის პრობლემას.
"ნურავინ იფიქრებს, რომ "უდოს" ვადების შემცირება კრიმინოგენულ სიტუაციას გააუარესებს, ვინაიდან "უდოთი" გათავისუფლება ეს არაა პატიმართა ავტომატური გათავისუფლება. პირობით ვადაზე ადრე გათავისუფლებისთვის პატიმართა ინდივიდუალური შერჩევა საკმაოდ მკაცრი კრიტერიუმებით ხდება", - განაცხადა ბაღათურიამ.
"ქართული დასის" მიერ შემუშავებული საკანონმდებლო პაკეტიდან ერთ-ერთი კანონპროექტი - პატიმართა პირობით ვადაზე ადრე გათავისუფლების ვადების შემცირებასთან დაკავშირებით _ დღეს იურიდიულ საკითხთა კომიტეტმა განიხილა.
