ანტიკრიზისული საბჭო რეგიონალური განვითარებისა და ინფრასტრუქტურის სამინისტროს წლის განმავლობაში განხორციელებული სამუშაოების ხარისხს უწუნებს.
"სამუშაოების უმეტესი ნაწილი შესრულებულია და 90 %-თან დაკავშირებით საბჭოს პრეტენზიები არ აქვს, თუმცა არის შემთხვევები, როცა ამა თუ იმ პროექტის გაწერილ ვადაში დასრულება არ მოხდა, ან ის უხარისხოდაა შესრულებული", - განაცხადა საბჭოს თავმჯდომარე გია თორთლაძემ საბჭოს დღევანდელ სხდომაზე.
მისივე განმარტებით, რიგ შემთხვევაში ადგილი ჰქონდა დონორი ორგანიზაციების მიერ გამოყოფილი თანხმების არამიზნობრივად ხარჯვასაც.
გარდა ამისა, კიდევ ერთი შენიშნვა, რაც საბჭოს წევრებს რამაზ ნიკოლაიშვილის უწყებასთან აქვთ, პროექტების განხორციელებაში ადგილობრივი მუნიციპალიტეტების მონაწილეობის ნაკლებობას უკავშირდება.
"არის პროექტები, რომელთა მიმდინარეობის შესახებაც ადგილობრივი მუნიციპალიტეტები საქმის კურსში არ არიან. პროცესში ამ ორგანოების უფრო მეტად ჩართვა უნდა მოხდეს", - განმარტა თორთლაძემ.
აღსანიშნავია, რომ აღნიშნულთან დაკავშირებით ანტიკრიზისული საბჭოს წევრები შესაბამის ახსნა-განმარტებასა და ინფორმაციას ამ წუთებში რეგიონალური განვითარებისა და ინფრასტრუქტურის მინისტრის პირველი მოადგილის ჯამბულ ბაკურაძისგან ისმენენ. საბჭოს სხდომა რამდენიმე წუთის წინ დაიწყო.
