ახალი სალარო აპარატების შეძენა მეწარმეებს არ მოუწევთ და მის ღირებულებას სახელმწიფო დააფინანსებს
ამის შესახებ მთავრობის დღევანდელი სხდომის დაწყების წინ ფინანსთა მინისტრმა კახა ბაინდურაშვილმა განაცხადა. ამასთან ჟურნალისტებთან საუბრისას მინისტრმა კიდევ ერთხელ განმარტა ის დადებითი პროცესები რომელიც ახალი სალარო აპარატების შემოღებას მოჰყვება.
"აქამდე სალარო აპარატების კონტროლისას დამოკიდებული ვიყავით საგადასახადო ინსპექტორებზე და ამ მიზნით ყოველდღიურად სამი ათასამდე ინსპექტორს უწევდა მუშაობა. ეს იმის იყო განპირობებული, რომ ავტომატიზებული სისტემა არ გვქონდა რაც დასავლეთში აპრობირებულია. სწორედ ამის გამო გადაწყდა "GPAR"-ის სისტემის აპარატების შემოღება. რითაც საგადასახადო ორგანო უწყების შესაბამის ცენტრალურ ოფისთან იქნება დაკავშირებული და ყველა "ამორტყმულ" ჩეკზე ინფორმაცია ავტომატურად მიეწოდება", _ განმარტა ფინანსთა მინისტრმა.
აღსანიშნავია, რომ კახა ბაინდურაშვილს არ დაუკონკრეტებია თუ რა დაუჯდება სახელმწიფოს ახალი სალარო აპარატების შეძენა.