ექსპერტი ეკონომიკის საკითხებში ირაკლი ლექვინაძე მიიჩნევს, რომ თავისუფალი ინდუსტრიული ზონების ჩამოყალიბება საქართველოს სხვადასხვა რეგიონებში ძალიან მნიშვნელოვანია.
"თურქული კომპანიის ეს გადაწყვეტილება ჩვენი ქვეყნისთვის პოზიტიურად მიმაჩნია, თურქებს საკმაოდ დიდი გამოცდილება აქვს ტანსაცმლის, კვების პროდუქტების, სოფლის მეურნეობის, მსუბუქი ინდუსტრიის სხვადასხვა დარგებში, ამ ზონაში ალბათ მსგავსი პროფილის კომპანიები ააწყობენ საქმიანობას, რაც რა თქმა უნდა ადამიანების დასაქმებას და ახალი ტექნოლოგიების შემოტანას შეუწყობს ხელს. ასევე გაზრდის საქართველოდან ექსპორტს", _ აცხადებს "ჯი-ეიჩ-ენთან" საუბარში ლექვინაძე.
მისივე თქმით, ხელვაჩაურის ინდუსტრიული ზონის მოწყობა ადრეც იყო დაგეგმილი, თუმცა აქამდე ვერ მოხერხდა.
"ალბათ სხვადასხვა საკითხების შეთანხმებაზე იყო კონსულტაციები, როგორიცაა ქართული მხარის მიერ შესაბამისი, მინიმალური ინფრასტრუქტურის მოწყობა და მისი სიიაფე. მე ძალიან მენიშნა მინიმალური ფასების დაწესება ელექტროენერგიაზე, წყალზე და ბუნებრივ აირზე. ეს ძალიან მნიშვნელოვანია არამარტო ამ ინდუსტრიული ზონისთვის არამედ მთლიანად საქართველოს ტერიტორიაზე მოქმედი ბიზნეს კომპანიებისთვის. მიმაჩნია, რომ ამ რესურსების მოხმარებაზე (ელ- ენერგია, წყალი, ბუნებრივი აირი) კორპორატიული ტარიფები დღეს არსებულზე 2-3-ჯერ იაფი უნდა იყოს, რადგან მისი წილი ბიზნესის ხარჯების სტრუქტურაში საკმაოდ დიდია, რაც აძვირებს ადგილობრივ პროდუქციას და შედარებით არაკონკურენტუნარიანს ხდის მას", _ აცხადებს "ჯი-ეიჩ-ენთან" საუბრისას ლექვინაძე.
შეგახსენებთ, რომ თურქული კომპანია "უღერსანსი" აჭარაში თავისუფალი ინდუსტრიული ზონის შექმნით ინტერესდება. როგორც სააგენტო "ჯი-ეიჩ-ენს" აჭარის მთავრობიდან აცნობეს, კომპანიის წარმომადგენლები უკვე შეხვდნენ აჭარის ფინანსთა და ეკონომიკის მინისტრს ვაჟა ბოლქვაძეს. მინისტრმა ბიზნესმენებს გააცნო რეგიონის საინვესტიციო გარემო და სახელმწიფოს მიდგომა პრიორიტეტული დარგებისადმი.
აჭარის მთავრობაში აცხადებენ, რომ იზმირი თურქეთის ერთ-ერთი ყველაზე განვითარებული ინდუსტრიული რეგიონია და იქაური ბიზნესმენების მოზიდვა მნიშვნელოვანია. აჭარის მთავრობა ხელვაჩაურში 15 ჰექტარ მიწის ნაკვეთზე თავისუფალ ინდუსტრიული ზონის მოსაწყობად მოლაპარაკებებს ინვესტორებთან რამოდენიმე წელია აწარმოებს. პროექტის თანახმად ინვესტორთან გაფორმებული ხელშეკრულების შემდეგ ინდუსტრიული ზონა ხელვაჩაურში 2 წელიწადში უნდა მოეწყოს, სადაც 4 600 სამუშაო ადგილის შექმნა. ხოლო ის კომპანიები, რომლებიც ზონაში დაიწყებენ ოპერირებას განსაკუთრებული საგადასახადო რეჟიმითაც ისარგებლებენ. საგადასახადო შეღავათების გარდა განსაკუთრებული შეღავათები დაწესდება ელექტროენერგიის გადასახადზე, სადაც 1კვ/სთ _ 9,6 თეთრი ეღირება მაშინ როდესაც დენზე კომერციული ფასი საქართველოში 14 თეთრია, ხოლო რაც შეეხება ბუნებრივი არის გადასახადს ის 1000 კუბ/მ-ზე 350 დოლარის ფარგლებში იქნება.
