მწვერვალ თეთნულდზე ჩარჩენილი 6 ტურისტიდან ერთ-ერთი დაიღუპა. ტურისტი ნაპრალში იყო გადავარდნილი და მის ამოსაყვანად სამაშველო სამუშაოები რამდენიმე საათის განმავლობაში მიმდინარეობდა. გარდაცვლილი მესტიაში გადაასვენეს.
რაც შეეხება დანარჩენ 5 ტურისტს, თავდაპირველად მწვერვალიდან მესტიაში ვერტმფრენით ორი მათგანი გადაიყვანეს, რომლებიც დაშავებულები იყვნენ. ერთ-ერთ მათგანს ტერფი ჰქონდა მოტეხილი და თაბაშირი დაადეს, მეორეს კი დაბეჟილობა და სისხლნაჟღენთები აღენიშნებოდა. სხვა ტურისტის ჯანმრთელობის მდგომარეობა დამაკმაყოფილებელია.
შეგახსენებთ, ტურისტების სამაშველო ოპერაცია ორი დღის განმავლობაში მიმდინარეობდა. ლოკაციის დადგენა შეტყობინების მიღებიდან მალევე მოხდა, თუმცა უამინდობის და რთული რელიეფის გამო, მათთან მისვლა გართულებული იყო.