რუსეთის პრეზიდენტმა ვლადიმირ პუტინმა აპრილში კიბოს პროგრესირებადი ფორმის მკურნალობა გაიარა. ამის შესახებ ამერიკული ყოველკვირეული ჟურნალი Newsweek იტყობინება.
პუბლიკაცია ეყრდნობა ამერიკის სადაზვერვო საზოგადოების სამი წარმომადგენლის მონათხრობს, რომელთაც მაისის ბოლოს წაიკითხეს აშშ-ის დაზვერვის მეოთხე საიდუმლო ანგარიში.
გამოცემის მონაცემებით, ანგარიშიდან ირკვევა, რომ მარტში, სავარაუდოდ, თავდასხმა მოხდა პუტინზე.
"პუტინის ძალაუფლება ძლიერია, მაგრამ არა აბსოლუტური", - განუცხადა Newsweek-ს ერთ-ერთმა წყარომ. "კრემლში მისი მმართველობის მთელი პერიოდის განმავლობაშ არასოდეს ყოფილა ბრძოლა ასეთი ინტენსიური, ყველა გრძნობს, რომ დასასრული ახლოვდება", - ამბობს წყარო.
ამავდროულად, სამივე წყარო - აშშ-ის ეროვნული დაზვერვის დირექტორის აპარატის (ODNI) წარმომადგენელი, სამხედრო-საჰაერო ძალების თადარიგის უფროსი ოფიცერი და პენტაგონის სადაზვერვო სააგენტოს (DIA) თანამშრომელი, ამბობს, რომ რუსეთის ლიდერის იზოლაცია ამერიკის სპეცსამსახურებს ურთულებს გააკეთოს ზუსტი შეფასება პუტინის ჯანმრთელობის მდგომარეობის შესახებ.
ერთ-ერთი წყაროს თქმით, პუტინს ბევრი შეხვედრა არ ჰქონია უცხოელ ლიდერებთან, რაც ინფორმაციებისადმი წვდომას აფერხებს, რომელთა მიღებაც ზოგჯერ შესაძლებელია პირადი შეხვედრებიდან. "ამგვარად, პუტინის იზოლაციამ სპეკულაციის დონე გაზარდა", - განაცხადა წყარომ.
"ჩვენ უნდა გვახსოვდეს, თუ რა გავლენა აქვს სწრაფვას - მივიღოთ სასურველი სინამდვილედ... ჩვენ ვისწავლეთ და შესაძლოა, არც ვისწავლეთ რთული გაკვეთილები ბინ ლადენთან და სადამ ჰუსეინთან დაკავშირებით", - განაცხადა სამხედრო-საჰაერო ძალების უფროსმა ოფიცერმა.
ბოლო თვეების განმავლობაში მედიაში არაერთხელ გაჩნდა სპეკულაციები პუტინის ჯანმრთელობის მდგომარეობის გაუარესების შესახებ. კერძოდ, აპრილის დასაწყისში გამოცემა "პროექტი" წერდა, რომ რუსეთის პრეზიდენტს ხშირად ნახულობს ექიმი - ქირურგი ონკოლოგი. მისი ინფორმაციით, მხოლოდ სოჭში ექიმი პუტინთან 35-ჯერ ჩავიდა.
რუსეთის საგარეო საქმეთა მინისტრმა სერგეი ლავროვმა 29 მაისს ფრანგულ ტელეარხ TF1-თან უარყო ინფორმაცია პუტინის ჯანმრთელობის გაუარესების შესახებ. ეს იყო მაღალი რანგის პოლიტიკოსის პირველი განცხადება რუსეთის პრეზიდენტის ავადმყოფობის შესახებ გავრცელებული ინფორმაციების პასუხად.
