დაღესტანში ერთ-ერთი სკოლის „ბოლო ზარის“ ღონისძიებაზე, დამამთავრებელი კლასის მოსწავლის შეძახილი გაისმა „თავისუფლება უკრაინას! პუტინი - ეშმაკი!“
ინფორმაციას უკრაინული მედია რუსული მედიაპროექტის მთავარ რედაქტორ დმიტრი კოზელევზე და ადგილობრივ Telegram- არხებზე დაყრდნობით ავრცელებს.
მედიის თანახმად, ღონისძიების დროს მე-11 კლასის მოსწავლე ზუჰრა ალბეკოვა მიკროფონს მიუახლოვდა და რუსულად დაიყვირა: „არა ომს! თავისუფლება უკრაინას! პუტინი - ეშმაკი!“
დაუდგენელია, კონკრეტულად რომელ სკოლაშია გადაღებული ვიდეო, ცნობილია მხოლოდ, რომ ეს ქალაქ იზბერბაშის ერთ-ერთ სკოლაში მოხდა. ვიდეოჩანაწერში არ ჩანს კურსდამთავრებული, რომელმაც ლოზუნგები წამოიძახა.
დაღესტანში ხელისუფლების მომხრე ტელეგრამ-არხების თანახმად, გოგონას მიმართ ასაქმე აღიძრა მუხლით, რომლის თანახმად ისჯება რუსეთის შეიარაღებული ძალების დისკრედიტაციის მიმართულებით ჩადენილი საჯარო ქმედება. ასევე საქმე აღიძრა დედის მიმართ იმ მუხლით, რომელიც ეხება არასრულწლოვანის კანონიერ წარმომადგენლებს, ვინც არ შეასრულებს არასრულწლოვანის მოვლისა და აღზრდის ვალდებულებას.
უკრაინული მედიის ინფორმაციით, რუსეთის მიერ უკრაინაში წარმოებულ დამპყრობლურ ომში, დაღუპულთა ყველაზე მეტი რაოდენობა დაღესტანში ფიქსირდება.