ჩრდილოატლანტიკურ ალიანსში ფინეთისა და შვედეთის ელჩებმა, კლაუს კორჰონენმა და აქსელ ვერნოფმა გენერალურ მდივან იენს სტეოლტენბერგს ნატოში გაწევრიანების განაცხადები გადასცეს.
იენს სტოლტენბერგი მიესალმა განაცხადების მიღებას და ამ დღეს ისტორიული მომენტი უწოდა.
"ეს არის ძალიან კარგი დღე ჩვენი უსაფრთხოებისთვის ამ კრიტიკულ მომენტში. მადლობა ფინეთსა და შვედეთს ნატო-ში გაწევრიანების სურვილის შესახებ განაცხადების გადმოცემისთვის. ყველა ქვეყანას აქვს უფლება, თავად განსაზღვროს საკუთარი გზა. თქვენ, ორივე ქვეყანამ გააკეთეთ თქვენი არჩევანი, დემოკრატიული პროცესების თანმიმდევრულად და მე მივესალმები ფინეთისა და შვედეთის ნატო-ში გაწევრიანების შესახებ განაცხადს. თქვენ ხართ ჩვენი ახლო პარტნიორები, თქვენი ნატო-ში წევრობა გააძლიერებს ჩვენს საერთო უსაფრთხოებას. თქვენი დღევანდელი განაცხადები ისტორიული ნაბიჯია. ახლა მოკავშირეები განსაზღვრავენ თქვენი გაწევრიანების გზაზე შემდგომ ნაბიჯებს", - თქვა სტოლტენბერგმა.
ნატოში გაწევრიანებისთვის მისი ყველა, 30-ვე წევრის თანხმობაა საჭირო. ამ დროისთვის, თურქეთი აცხადებს, რომ მხარს არ დაუჭერს სკანდინავიური ქვეყნების ნატოში გაწევრიანებას. მოკავშირეები ვარაუდობენ, რომ მოახერხებენ თურქეთის წინააღმდეგობის დაძლევას, კონსენსუსის მიღწევის გზით.
